ნავთობის მოპოვებისა და მარაგების მიხედვით მსოფლიოში უმსხვილესი კომპანია Saudi Aramco აპირებს უახლოესი კვირების განმავლობაში აშშ-ში ნედლეულის მიწოდების შემცირებას და ამავე დროს თავისი მარაგების ზრდის შეჩერებას. ამის შესახებ ინფორმაციას ავრცელებს სააგენტო Bloomberg.
სააგენტოს მონაცემებით, ამერიკის ნავთობგადამამუშავებელ საწარმოებს აცნობეს წინასწარ იმის შესახებ, რომ საუდის არაბეთი მათ გაცილებით ნაკლებ ნავთობს მიაწვდის წინა თვეებთან შედარებით. ასეთი ნაბიჯი აიხსნება "ოპეკი +"-ის გადაწყვეტილებით ნავთობის მოპოვების შემცირებასთან დაკავშირებით.
Bloomberg არ გამორიცხავს, რომ საუდის არაბეთიდან აშშ-სი ნავთობის მიწოდებამ მომავალ წელს შესაძლოა შეადგინოს 582 ათასი ბარელი/დღე-ღამეში. ეს ყველაზე დაბალი მაჩვენებელია ბოლო 30 წლის განმავლობაში, რომელიც დაფიქსირდა 2017 წლის ბოლოს. ეს დაახლოებით 40%-ით ნაკლებია საუდის არაბეთიდან აშშ-ში ნავთობის ექსპორტის საშუალო ოდენობასთან შედარებით, რომელიც გათვლილია ბოლო კვარტლის შედეგებით.
საუდის არაბეთის გეგმის შესრულება დარტყმას მიაყენებს ამერიკის ისეთ მსხვილ კომპანიებს, როგორებიცაა Valero Energy, Phillips 66, Chevron, Exxon Mobil და Marathon Petroleum. მათ მოუწევთ საუდის არაბეთიდან ნავთობის არასაკმარისი ოდენობით მიწოდების შევსება ექსპორტის გაზრდით მექსიკიდან, კანადიდან ან ვენესუელიდან.