უკრაინის მართლმადიდებელი ეკლესიების გამაერთიანებელი კრება დღეს გაიმართება. ამის შესახებ განცხადება უკრაინის პრეზიდენტმა პეტრო პოროშენკომ გააკეთა.
მისი განცხადებით, უკრაინის მართლმადიდებლური ეკლესიების კრება კიევში, წმინდა სოფიას ტაძარში გაიმართება, სადაც აირჩევენ გაერთიანებული ეკლესიების ახალ პატრიარქს და უკრაინის ავტოკეფალური ეკლესიის შექმნა ოფიციალურად გამოცხადდება. ამავე კრებაზე, მსოფლიო პატრიარქი უკრაინის ეკლესიის ახალ მეთაურს ავტოკეფალიის ტომოსს გადასცემს.
შეგახსენებთ, რომ მსოფლიო პატრიარქის თავმჯდომარეობით, 2018 წლის 9 ოქტომბერს, კონსტანტინოპოლში გამართულ სინოდის სხდომაზე მიიღეს გადაწყვეტილება უკრაინის ეკლესიისთვის ავტოკეფალიის მინიჭების პროცესის გაგრძელების შესახებ. ასევე, უკრაინის მართლმადიდებელი ეკლესიის (კიევის საპატრიარქო) პატრიარქ ფილარეტს და უკრაინის ეკლესიის მიტროპოლიტ მაკარის ანათემა მოუხსნა და მათი კანონიკური სტატუსი აღადგინა. გარდა ამისა, მსოფლიო საპატრიარქოს წმინდა სინოდმა 1686 წლის სინოდალური წერილი, რომლის მიხედვით, მოსკოვის პატრიარქს კიევის მიტროპოლიტის ხელდასმის უფლებას აძლევდა, გაუქმებულად გამოაცხადა.
ამის შემდეგ, რუსეთის მართლმადიდებელი ეკლესიის სინოდმა კონსტანტინოპოლთან ევქარისტიული კავშირი სრულად გაწყვიტა.