ჩემი აზრით, აღნიშნული ინიციატივა არის მცდელობა იმისა, რომ "საჯარო სამსახურის შესახებ" კანონის გვერდის ავლით მოხდეს დასაქმება ან თანამშრომლების გათავისუფლება, რაც არის როგორც არაკონსტიტუციური, - ამის შესახებ საქართველოს სახალხო დამცველმა ნინო ლომჯარიამ დაგეგმილ ცვლილებებთან დაკავშირებით განაცხადა, რომლის მიხედვით, ადმინისტრაციის თანამშრომლებს სამართლებრივი სტატუსი ეცვლებათ.
მისი თქმით, სახალხო დამცველის აპარატს მიაჩნია, რომ ეს არის ნამდვილად კონსტიტუციისა და "საჯარო სამსახურის შესახებ" ახალი კანონის სულისკვეთების საწინააღმდეგოდ ინიცირებული კანონპროექტი.
"საჯარო სამსახურის რეფორმა განხორციელდა სწორედ იმის გამო, რომ პოლიტიკურ ცვლილებებს არ მოჰყოლოდა პროფესიული საჯარო მოხელეების ცვლილება საჯარო სამსახურში. ჩემი აზრით, აღნიშნული ინიციატივა არის მცდელობა იმისა, რომ "საჯარო სამსახურის შესახებ" კანონის გვერდის ავლით მოხდეს დასაქმება ან თანამშრომლების გათავისუფლება, რაც არის როგორც არაკონსტიტუციური, ასევე წინააღმდეგობაში მთელ იმ რეფორმის სულისკვეთებასთან, რაც პოზიტიურად იყო შეფასებული",- განაცხადა ლომჯარიამ.
კანონპროექტის მიხედვით, პრეზიდენტის ადმინისტრაციის პროფესიული საჯარო მოხელეები ჩაითვლებიან ადმინისტრაციული ხელშეკრულებით დასაქმებულ პირებად.
ცნობისთვის, "საჯარო სამსახურის შესახებ" კანონში შესატანი ცვლილებები ადმინისტრაციის ყველა თანამშრომლის ადმინისტრაციული ხელშეკრულებებით დასაქმებაზე გადაყვანას ითვალისწინებს.
პრეზიდენტის საპარლამენტო მდივანის, ანა ნაცვლიშვილის განმარტებით, აღნიშნული ცვლილებები იმას ნიშნავს, რომ თანამშრომლებს, რომლებიც მრავალი წელია პრეზიდენტის ადმინისტრაციაში მუშაობენ და უზარმაზარი გამოცდილება გააჩნიათ, აღარ ექნებათ დაცულობის ის გარანტიები, რაც საჯარო მოხელეებს აქვთ და მათ სამსახურიდან ნებისმიერ დროს, კომპენსაციისა და ახსნა-განმარტების გარეშე გაუშვებენ.