ინიცირებისთვის მზად არის საგადასახადო კანონმდებლობაში ცვლილებები, რომლის მიხედვით, უფილტრო სიგარეტზე აქციზი ფილტრიან სიგარეტზე აქციზს გაუტოლდება, - ამის შესახებ პარლამენტის ჯანდაცვის კომიტეტის თავმჯდომარე აკაკი ზოიძემ განაცხადა.
მისი თქმით, ამით აღარ იარსებებს ის ჩანაცვლებელი ეფექტი, რომ ფილტრიანი სიგარეტიდან უფილტროზე გადავიდნენ, რადგან ის უფრო იაფია. მისივე განცხადებით, თამბაქოს მოხმარების შემცირებისთვის თამბაქოს აქციზის მატებას დიდი მნიშვნელობა აქვს.
ზოიძის განცხადებით, 2024 წლამდე აქციზი მთლიანი ფასის 60% უნდა გახდეს, დღეს კი, 40%-ს არ აღემატება.
"იმის მიუხედავად, რომ 2017 წელს აქციზის მატება მოხდა, თამბაქოს ფასთან დაკავშირებით საქართველო დაბალი მაჩვენებლით გამოირჩევა. რეგიონეში ერთ-ერთი ყველაზე დაბალი ფასი გვაქვს. მხოლოდ სომხეთშია საქართველოზე დაბალი ფასი და ისიც იმიტომ, რომ ცდილობენ საქართველოში კონტრაბანდის სახით შემოიტანონ“, - განაცხადა აკაკი ზოიძემ, რომელმაც აქვე აღნიშნა, რომ საქართველოს თამბაქოს მოხმარების კუთხით ეპიდემიის წითელ ხაზზეა და ეს პროცესი უნდა შეჩერდეს.