ჩვენი გუნდისთვის და არც ერთი ჩვენი თანაგუნდელისთვის არ არის მთავარი სკამები, არ არის მთავარი თანამდებობები, - ამის შესახებ საპარლამენტო უმრავლესობის ლიდერმა არჩილ თალაკვაძემ სამთავრობო ცვლილებებზე გავრცელებულ ინფორმაციასთან დაკავშირებით განაცხადა.
მისი თქმით, მთავარია შედეგები და ის თუ რამდენად ეფექტურად გადაჭრის მმართველი გუნდი იმ საკითხებს, რომელიც საზოგადოებისა და ქვეყნის წინაშე დგას.
„განცხადება, რომელიც პრემიერ-მინისტრმა გააკეთა, იყო ძალიან სწორი, რომ იმ პირობებში, იმ დაპირებების შესრულებაში, განვითარების ისეთ ტემპებში, როგორიც ჩვენ გვაქვს გაცხადებული და როგორსაც ვპირდებით საზოგადოებას, აუცილებელია თითოეულმა ჩვენმა თანაგუნდელმა შეასრულოს პირობა და შეიტანოს თავისი წვლილი განუხრელად. რაც შეეხება ცვლილებებს, როგორც იცით, საუბარი იყო იმაზე, რომ მაქსიმალური ხელშეწყობა ექნებათ ადამიანებს რეგიონებშიც და დედაქალაქშიც, რომლებმაც აჩვენეს შედეგი, რომლებმაც აჩვენეს და თავდადება ქვეყნის ინტერესების მიმართ“, - განაცხადა არჩილ თალაკვაძემ.