იმედს ვიტოვებ, ეს ყველაფერი დასრულდება ყოველგვარი ექსცესების გარეშე, - ამის შესახებ მთავრობის ადმინისტრაციის უფროსმა კახა კახიშვილი გაერთიანებული ოპოზიციის აქციასთან დაკავშირებით განაცხადა, რომელიც შესაძლოა, პრეზიდენტის ინაუგურაციის პარალელურად, თელავში გაიმართოს.
პრეზიდენტის ინაუგურაციისთვის შექმნილი სპეციალური კომისიის წევრის თქმით, საქართველოს კანონი მიტინგებისა და მანიფესტაციების შესახებ იძლევა იმის საშუალებას, ადამიანმა გამოხატოს პროტესტი კანონით დადგენილ ფორმებში.
„თუ ეს პროტესტი არ იქნება წინააღმდეგობაში სხვადასხვა კანონმდებლობასთან, რომელიც ზღუდავს იმ მოქმედებებს, რომელიც არ არის დაშვებული, ეს არის ჩვეულებრივი პოლიტიკური პროცესი. იმედს ვიტოვებ, ეს ყველაფერი დასრულდება ყოველგვარი ექსცესების გარეშე", - განაცხადა კახა კახიშვილმა.
ცნობისთვის, საქართველოს პრეზიდენტის ინაუგურაცია თელავში, 16 დეკემბერს გაიმართება.
საპრეზიდენტო არჩევნების მეორე ტურში, რომელიც 28 ნოემბერს გაიმართა, სალომე ზურაბიშვილმა გაიმარჯვა.