სახალხო დამცველის აპარატი ზუგდიდის მეექვსე სკოლის დირექტორის, ია კერზაიას საქმეს სწავლობს.
როგორც სახალხო დამცველმა ნინო ლომჯარიამ ჟურნალისტებს განუცხადა, აპარატმა საქმის შესწავლა დაიწყო და რეაგირება პირველივე დღიდან ჰქონდა.
„ჩვენთან შემოსულია განცხადება ფაქტთან დაკავშირებით, სადაც დისკრიმინაციული მიდგომის დადგენას ითხოვენ. ჩვენ საქმის შესწავლა დავიწყეთ და რეაგირება პირველივე დღიდან გვქონდა. დავუკავშირდით ოჯახს, ჩართული ვიყავით საქმის გარემოებების შესწავლის პროცესში. თუკი ოჯახს სურვილი ექნება, ჩვენ ამ პროცესს გავაგრძელებთ“, - განაცხადა ლომჯარიამ.
ცნობისთვის, ზუგდიდის მე-6 საჯარო სკოლის დირექტორი, ია კერზაია დღეს გარდაიცვალა.
ია კერზაია ინსულტის დიაგნოზით, საავადმყოფოში მძიმე მდგომარეობაში იმყოფებოდა და მკურნალობას გადიოდა, თუმცა ექიმებმა მისი გადარჩენა ვერ შეძლეს.
მისი ჯანმრთელობის მდგომარეობა მას შემდეგ გაუარესდა, რაც სკოლაში გენერალური ინსპექცია შევიდა.
სკოლის დირექტორი ამბობდა, რომ სკოლაში ინსპექციის შესვლა არჩევნებს უკავშირდებოდა.
კერზაია აბობდა, რომ რაც დირექტორმა პედაგოგების საარჩევნო პროცესში უკანონოდ ჩართვაზე უარი თქვა, ანონიმური წერილის საფუძველზე ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა. შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი.