მინდა, ამასთან დაკავშირებით საზოგადოება ძალიან მოკლედ ვუთხრა, რომ არანაირი მცდელობა შანტაჟის ჩემ მიმართ და ბუნებრივია, არანაირი გარიგებაც ამ მიმართულებით არ ყოფილა, - ამის შესახებ საქართველოს პრეზიდენტმა გიორგი მარგველაშვილმა მისი სიძის, მინდია გოგოჭურის საქმესთან დაკავშირებით "ქრონიკას" განუცხადა.
მისი თქმით, გემოვნების საკითხია, თუ ვინ როგორ ხედავს ამ საკითხს.
"მე ყველა ეტაპზე, ყველა საკითხზე, რაც მიმდინარეობდა ბოლო პერიოდის განმავლობაში, კომენტარი და შეფასება მქონდა გაკეთებული, მაგრამ ამას რომ თავი დავანებოთ, უბრალოდ, მინდა იცოდეს საზოგადოებამ - არანაირი მცდელობა იმის, რომ ვინმეს შანტაჟი მოეხდინა არ ყოფილა და არც არანაირი გარიგება არსებობს არც ერთ პოლიტიკურ ჯგუფთან ამ საკითხთან დაკავშირებით“, - განაცხადა მარგველაშვილმა.
ცნობისთვის, მინდია გოგოჭური სამართალდამცველებმა 5 დეკემბერს, გვიან ღამით, თბილისში სპეცოპერაციის დააკავეს. მას პატიმრობა 7 დეკემბერს შეეფარდა. პროკურატურის ინფორმაციით, არსებობდა მოწმეებზე ზემოქმედების, მტკიცებულებების განადგურებისა და მიმალვის საფრთხე, რის გამოც მოსამართლემ მათი შუამდგომლობა სრულიად დააკმაყოფილა.
მინდია გოგოჭურს ბრალი დანაშაულის დაფარვისა და ჯგუფურად იარაღის შეძენა-შენახვა-ტარების მუხლით აქვს წარდგენილი. დანაშაული 8-დან 14 წლამდე თავისუფლების აღკვეთას ითვალისწინებს. ის ბრალს არ აღიარებს.