ცნობილი რუსი უფლებადამცველი, ადამიანის უფლებათა აქტივისტი, ადამიანის უფლებების დამცველი ორგანიზაციის „მოსკოვის ჰელსინკის ჯგუფის“ ერთ-ერთი დამფუძნებელი და წევრი, ყოფილი საბჭოთა დისიდენტი ლუდმილა ალექსეევა 91 წლის ასაკში გარდაიცვალა
1968 წელს საბჭოთა ხელისუფლების კრიტიკის გამო ლუდმილა ალექსეევა კომუნისტური პარტიიდან გარიცხეს, თუმცა ამას არ დაუბრკოლებია მისი საქმიანობა ადამიანის უფლებების დაცვისთვის. მოგვიანებით, 1977 წელს ალექსეევამ დატოვა საბჭოთა კავშირი და ამერიკის შეერთებულ შტატებში გადავიდა საცხოვრებლად, სადაც 1982 წელს მიიღო შტატების მოქალაქეობა. ის რეგულარულად აგრძელებდა საქმიანობას, რომლის მიზანს საბჭოთა ხელისუფლების საქმიანობის მხილება და ქვეყანაში ადამიანის უფლებრივი მდგომარეობის კრიტიკა იყო.
1993 წელს, საბჭოთა კავშირის დაშლის შემდეგ, ლუდმილა ალექსეევა დაბრუნდა რუსეთში და 1996 წელს გახდა „მოსკოვის ჰელსინკის ჯგუფის“ თავმჯდომარე. 2000 წელს ლუდმილა ალექსეევა შეუერთდა ვლადიმერ პუტინის მრჩეველთა საბჭოს, რომელიც ადამიანის უფლებათა საკითხებზე მუშაობდა. ამ გადაწყვეტილებამ ზოგიერთი უფლებადამცველის მხრიდან კრიტიკა გამოიწვია.
ლუდმილა ალექსეევა აგრძელებდა კრემლის პოლიტიკის კრიტიკას. 2006 წელს ალექსეევამ მწვავედ გააკრიტიკა ქართველების რუსეთიდან მასობრივი დეპორტაცია. 2014 წელს კი დაგმო კრემლის მიერ ყირიმის ნახევარკუნძულის ანექსია.
ლუდმილა ალექსეევას 90 წლის იუბილეზე სახლში ეწვია რუსეთის პრეზიდენტი ვლადიმერ პუტინი და პირადად მიულოცა მას დაბადების დღე. ეს ვიზიტი საერთაშორისო მედიამ შეაფასა, როგორც „დაუნდობელი ექსპლოატაცია“ და „ტროლინგი“. ჟურნალისტები აღნიშნავდნენ თუ რაოდენ დიდი იყო პუტინის ირონია, როდესაც ის სვამდა შამპანურს ლუდმილა ალექსეევასთან ერთად.
ლუდმილა ალექსეევა 8 დეკემბერს, მოსკოვის ერთ-ერთ საავადმყოფოში, გარდაიცვალა.