ჰამბურგში, "ქრისტიან-დემოკრატიული" კავშირის ყრილობაზე პარტიის თავმჯდომარედ, ანგელა მერკელის ნაცვლად, ანეგრეტ კრამპ-კარენბაუერი აირჩიეს. კარენბაუერს თავმჯდომარედ არჩევამდე პარტიის გენერალური მდივნის პოსტი ეკავა.
პარტიის ყრილობა თავმჯდომარის რანგში გერმანიის კანცლერმა ანგელა მერკელმა დღეს უკნასკნელად გახსნა. სხდომას 1001 დელეგატი ესწრებოდა.
პარტიის თავმჯდომარის პოსტზე ყველაზე აქტიურად ორი კანდიდატი განიხილებოდა - ანეგრეტ კრამპ-კარენბაუერი და ფრიდრიხ მერცი. ეს უკანასკნელი მერკელის აქტიური ოპონენტია და მიგრაციული პოლიტიკის გამკაცრებას უჭერს მხარს. კარენბაუერი კი, როგორც ამბობენ, მერკელის ფავორიტადაა მიჩნეული.
მერკელმა, რომელიც გერმანიის მთავრობას 2005 წლიდან ხელმძღვანელობს, რამდენიმე ხნის წინ განაცხადა, რომ 2021 წელს კანცლერის პოსტზე კენჭს აღარ იყრიდა. ასევე განაცხადა, რომ არ აპირებდა ბუნდესტაგში ადგილის მოსაპოვებლად ბრძოლას და „ქრისტიან-დემოკრატიული კავშირის“ თავმჯდომარის პოსტზე თავის კანდიდატურას არ დააყენებდა.
