საკონსტიტუციო სასამართლო თავისი გადაწყვეტილებებით შეკითხვებს უფრო აჩენს, ვიდრე პასუხებს, – ამის შესაახებ საპარლამენტო უმრავლესობის წევრმა რომან კაკულია საკონსტიტუციო სასამართლოს გადაწყვეტილებასთან დაკავშირებით განაცხადა, რომლის თანახმადაც უცხოეთის მოქალაქეებზე სასოფლო-სამეურნეო დანიშნულების მიწების გასხვისების მორატორიუმი არაკონსტიტუციურად იქნა ცნობილი.
მისი თქმით, ეს გადაწყვეტილება უცნაურია.
„ყოველთვის ვამბობდი, საზოგადოებამ ძალიან კარგად უნდა იცოდეს, რომ მიწასთან დაკავშირებული საკითხების მხოლოდ ეკონომიკურ ჭრილში განხილვა არ არის ჩემი პრიორიტეტი, საზოგადოებამ ისიც უნდა იცოდეს, რომ ვინც მხოლოდ ეკონომიკურ ჭრილში განიხილავს ამ საკითხს, ავტომატურ რეჟიმში გეუბნებათ, რომ ეთნოკულტურული ცვლილებები ამ ქვეყანაში ასევე მისაღებია მათთვის.
მე რაც შემეძლება, ყველაფერს გავაკეთებ, რომ ორგანული კანონი და იქ არსებული ნორმები რაც შეიძლება მალე ამოქმედდეს. თუ საზოგადოებას ამ მიდგომებისა და მსოფლმხედველობის ადამიანები სურს ხელისუფლებაში, ამის არჩევანის უფლება ძალიან მალე ექნება.
ჩემი აზრით, საკონსტიტუციოს გადაწყვეტილება შემთხვევითი არ არის. ძალიან რბილად რომ ვთქვათ, უცნაურია“, – განაცხადა რომან კაკულიამ.
ცნობისთვის, საკონსტიტუციო სასამართლოს პლენუმმა სასოფლო-სამეურნეო დანიშნულების მიწების უცხოეთის მოქალაქეებზე გასხვისებასთან დაკავშირებით დაწესებული მორატორიუმი არაკონსტიტუციურად გამოაცხადა. უცხოეთის მოქალაქეებზე მიწების გასხვისების მორატორიუმი ძალადაკარგულად გამოცხადდა, თუმცა შეზღუდვები მხოლოდ 16 დეკემბრამდე მოიხსნა, რადგან პრეზიდენტის ინაუგურაციის შემდეგ ახალი კონსტიტუცია ამოქმედდება, რომელიც სასოფლო-სამეურნეო დანიშნულების მიწების უცხოეთის მოქალაქეებზე გასხვისების შესახებ შეზღუდვებს კვლავ აწესებს.