"ნაციონალური მოძრაობა", როგორც რეჟიმი, უნდა იყოს გასამართლებული, - ამის შესახებ საპარლამენტო უმრავლესობის წევრმა ლევან კობერიძემ გავრცელებულ ინფორმაციასთან დაკავშირებით განაცხადა, რომლის თანახმადაც, 16 დეკემბერს გაერთიანებულმა ოპოზიციამ შესაძლოა, თელავში აქცია გამართოს.
მისი თქმით, გაერთიანებულ ოპოზიციაში გაწევრიანებულ პირებს შეუძლიათ გამართონ ნებისმიერი აქცია, შეიკრიბონ სადაც უნდა.
"ამ არჩევნებშიც და სხვა არჩევნების დროსაც დავინახეთ, რომ ყველა აქციამ ჩაიარა მშვიდობიანად. ასევე იქნება ახლაც. თუმცა ვფიქრობ, თელავში მთავარი მოვლენა არა აქცია, არამედ ქალი პრეზიდენტის ინაუგურაცია იქნება", - განაცხადა კობერიძემ.
რაც შეეხება ვადამდელ საპარლამენტო არჩევნებთან დაკავშრებით ოპოზიციის მოთხოვნას, კობერიძის თქმით, ძალიან მნიშვნელოვანია ოპოზიციამ მკაფიოდ თქვას, თუ რატომ აყენებს ამ საკითხს.
"ჩნდება აღქმა, რომ მათ უბრალოდ უნდათ იყვნენ პარლამენტში და ამიტომ აყენებენ ამ მოთხოვნას. სხვა მხრივ, ეს მოთხოვმა ჩემთვის გაუგებარია. თქვენც კითხეთ და მეც ვკითხავ აუცილებლად, თუ რა არის ამ მოთხოვნის მოტივი", - აღნიშნა კობერიძემ.