სტრასბურგის სასამართლოს გადაწყვეტილებების აღსრულებაზე ზედამხედველი ორგანო ევროპის საბჭოს კომიტეტი საქართველოს ხელისუფლებას ვანო მერაბიშვილის საკნიდან გაყვანის ეპიზოდის გამოსაძიებლად 6 თვეს აძლევს, - ამის შესახებ ყოფილი პრემიერის ადვოკატმა გიორგი ჩივიაშვილმა განაცხადა.
მისი თქმით, მერაბიშვილს მოსთხოვეს, რომ მიხეილ სააკაშვილისა და ზურაბ ჟვანიას საქმეებზე ჩვენება მიეცა და თუ ამას არ გააკეთებდა, ძალიან დიდ ხანს მოუწევდა ციხეში ყოფნა.
"ზუსტად ამ ნაწილთან დაკავშირებით ევროსაბჭოს მინისტრთა კომიტეტმა დასვა კითხვები, რომ დაადგინოს ხელისუფლება, იყო თუ არა კავშირი მის გაყვანა-ზეწოლასა და მის მიმართ არსებულ სხვა სისხლის სამართლის საქმეებს შორის.
პარალელურად, მოუწოდა ხელისუფლებას, რომ მოახდინოს გამოძიება, დააიდენტიფიციროს ყველა ის პირი, ვინც მონაწილეობდა მერაბიშვილის გაყვანის ღონისძიებაში, მასზე ზეწოლის განხორციელებაზე და მოახდინოს მათი პასუხისგებაში მიცემა. ამ ყველაფრისთვის მინისტრმა კომიტეტმა საქართველოს ხელისუფლებას განუსაზღვრა მაქსიმუმ ექვსი თვე“, - განაცხადა ჩივიაშვილმა.