მე არ ვარ გაბუნიას ადვოკატი, თუმცა ვფიქრობ, რომ გარკვეულ ინტერპრეტაციას დაექვემდებარა მისი გამონათქვამი, - ამის შესახებ პარლამენტის ვიცე-სპიკერმა გია ვოლსკიმ "ქალთა მოძრაობის" მიმართვასთან დაკავშირებით განაცხადა.
მისი თქმით, დიმიტრი გაბუნიასთან დაკავშირებით გადაწყვეტილება მიღებული ჯერ არ არის და ის ფიქრობს, რომ "მკაფიო და მკაცრი განცხადებებისგან ჯერჯერობით ყველამ თავი უნდა შეიკავოს".
რაც შეეხება გაბუნიას განცხადებას, [რას აკეთებდა ზვიად დევდარიანი ისეთს, რომელსაც ნებისმიერი ჩვენგანი არ აკეთებს, ზოგადად მიმოწერაზე ვამბობ] ვოლსკიმ უპასუხა, რომ ადვოკატის გამონათქვამი გარკვეულ ინტერპრეტაციას დაექვემდებარა.
"მე არ ვარ გაბუნიას ადვოკატი, თუმცა ვფიქრობ, რომ გარკვეულ ინტერპრეტაციას დაექვემდებარა მისი გამონათქვამი. ისე წარმოაჩინეთ სიტუაცია, თითქოს იმან აღიარა თავისი დანაშაული და ადვოკატი ამ დანაშაულზე საუბრობს, რომ ეს დანაშაული არაფერს წარმოადგენს და არც ერთი ნიშნით არ შეიძლება იყოს ის გამტყუნებული. ასე წარმოადგენენ თავის პოზიციას. ამ დროს გაბუნია ამბობს, რომ შესაძლოა ასეთი მიმოწერა ჰქონდეს ნებისმიერ ადამიანს და ეს არ ნიშნავს, რომ დანაშაულის ნიშნები არის სახეზე. მე კიდევ ვიმეორებ, ინტერპრეტაციაა ამ საკითხისა არ ეხება არც გია ვოლსკის და არც ნებისმიერ სხვა პოლიტიკოსის სასაუბრო თემებს. არსებობს საკითხები, რომელიც სასამართლოს მიერ არის შესაფასებელი, მაგალითად იყო თუ არა დამნაშავე ადამიანი, ვისაც გაბუნია იცავდა. ვფიქრობ, მისი პოზიციები ამ საკითხზე ინტერპრეტირებულია, თუმცა იქნება იგი თუ არა საპარლამენტო მდივანი ესეც ჯერ კიდევ გაურკვეველი საკითხია", - განაცხადა გია ვოლსკიმ
ცნობისთვის, "ქალთა მოძრაობა" და NGO-ები სალომე ზურაბიშვილს მოუწოდებენ, გადახედოს საპარლამენტო მდივნად დიმიტრი გაბუნიას დანიშვნას.