პრეზიდენტის ინაუგურაციის თელავში გამართვით იმის ხაზგასმა ხდება, რომ ის ყველას პრეზიდენტია, - ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ სალომე ზურაბიშვილის ინაუგურაციასთან დაკავშირებით განაცხადა.
მისი თქმით, თელავთან დაკავშირებით თავად ზურაბიშვილმა ძალიან კარგი არგუმენტაცია წარადგინა.
"ძალიან მნიშვნელოვანია ხაზგასმა იმისა, რომ ახლადარჩეული პრეზიდენტი არის ყველას პრეზიდენტი, მიუხედავად იმ განწყობებისა თუ რა იყო თელავში, ეს ქალაქი შეირჩა სიმბოლურად. გარდა იმისა, რომ ისტორიული ადგილია, არჩეულმა პრეზიდენტმა ნაკლები ხმა მიიღო. ამით ხდება ხაზგასმა ერთის მხრივ იმის, რომ ის უნდა იყოს გამაერთიანებელი და მაკონსოლიდირებელი, ზეპარტიული პრეზიდენტი, ასევე ის, რომ განსაკუთრებული აქცენტი უნდა იყოს რეგიონებზე. ძალიან ბევრი აქცენტი შეიძლება დაისვას. ეს არის ძალიან საინტერესო ახალი ნაბიჯი იმისთვის, რომ ახლად არჩეულმა პრეზიდენტმა ზუსტად ის შინაარსი ატაროს, რაც საკონსტიტუციო ცვლილებებში დევს", - განაცხადა ეკა ბესელიამ.
ცნობისთვის, პრეზიდენტის ინაუგურაცია 16 დეკემბერს გაიმართება.