8 დეკემბერს, პარიზის ერთ-ერთ მთავარ ღირსშესანიშნაობას ეიფელის კოშკს ქალაქში დაგეგმილი საწვავის ფასების ზრდასთან დაკავშირებული დემონსტრაციების გამო დროებით დახურავენ.
პარიზის მერია ელისეის მინდვრებზე განთავსებული მაღაზიებისა და რესტორნების მფლობელებს მოუწოდებს, 8 დეკემბერს დაგეგმილი საპროტესტო აქციის გამო, შეწყვიტონ მუშაობა, რათა თავიდან აიცილონ მოსალოდნელი არეულობა.
მნახველებისთვის ასევე დახურული იქნება პარიზში მდებარე 10-ზე მეტი მუზეუმი.
ხელისუფლება აქტიურ ზომებს მიმართავს, რომ უსაფრთხოება მაქსიმალურად იყოს დაცული. მობილიზებულია სამართალდამცავთა უპრეცედენტოდ მაღალი რაოდენობა.
შეგახსენებთ, რომ საპროტესტო აქციები საფრანგეთის დედაქალაქში მესამე კვირაა იმართება, რომლის მთავარი მოთხოვნაა, ხელისუფლებამ გააუქმოს საწვავის გადასახადის გაზრდის შესახებ გადაწყვეტილება. საპროტესტო დემონსტრაციებს, რომლის ფარგლებშიც პარიზში 75 ათასი ადამიანი გამოვიდა ქუჩაში, არეულობა მოჰყვა.
პარიზის მერიამ დემონსტრაციების დროს მიღებული ზარალი 4 მლნ ევრომდე შეაფასა.