დაბრუნების მიზეზი მქონია, ხალხი გაბრაზებულია, რბილად რომ ვთქვათ, ნაწყენი, - განაცხადა პარტია "ქართული ოცნება - დემოკრატიული საქართველოს" თავმჯდომარემ, ბიძინა ივანიშვილმა "იმედი LIVE"-ის ეთერში.
„დაბრუნების მიზეზი მქონია და ჩემზე მეტად ხვდებოდა ხალხი, ესეც აჩვენა პირველმა ტურმა და არჩევნებმა, რომ ხალხი გაბრაზებულია, უფრო რბილად ვთქვა, ნაწყენია, თუმცა ოპონენტებმაც ძალიან ბევრი გააკეთეს. ის, რომ პრობლემები იყო, ეს ჩანდა, როდესაც აღვწერე ეს პროცესები, როგორც განვითარდა, როდესაც მთავრობის მეთაურმა დატოვა თანამდებობა. პრობლემები ჩანდა, რომ გუნდურობა დაიკარგა, ვერტიკალი იყო შესუსტებული, მთავრობასა და პარლამენტს შორის ურთიერთობა იყო ძალიან სუსტი, გუნდის წევრების ჩართულობა იყო ძალიან დაბალი, იგივე ხდებოდა ზუსტად რეგიონებში“, - განაცხადა ივანიშვილმა და აღნიშნა, რომ მმართველ პარტიაში გუნდურობა დაკარგული, ვერტიკალი კი ძალიან შესუსტებული იყო. ივანიშვილის თქმით, ასევე სუსტი იყო მთავრობასა და პარლამენტს შორის ურთიერთობა და ასეთივე მდგომარეობა იყო რეგიონებშიც.
ივანიშვილის განცხადებით, ერთ-ერთი მიზეზი, რატომაც პირველ ტურში ასეთი შედეგები დადგა ის არის, რომ მმართველ გუნდს ზედმეტი თვითდაჯერებულობა ჰქონდა.
„რა თქმა უნდა, აქ იყო პრობლემები, მე დავინახე და შეიძლება, ცოტაც დავაგვიანე, თუ არ დავაგვიანე, მაგრამ ხალხის რეაქციას თუ ვნახავთ, ხალხი არის აშკარად განაწყენებული, აშკარად ჩანს, რომ გუნდმა დაკარგა გრძნობადობა ხალხთან ურთიერთობის, გაჩნდა ბზარი ხელისუფლებასა და საზოგადოებას შორის“, – აღნიშნა ივანიშვილმა.