პარტია „ქართული ოცნების“ თავმჯდომარე ბიძინა ივანიშვილმა ტელეკომპანია „იმედის“ ეთერში საპრეზიდენტო არჩევნების პირველ ტურში „ფსიქოპროექტის“ მიერ ჩატარებულ ეგზიტპოლზე ისაუბრა და მას სამარცხვინო უწოდა.
ივანიშვილის თქმით, გუნდს, რომელიც ხელისუფლების ყველა შტოს ფლობს, თვითდაჯერებულობა ემატება.
„ზედმეტი თვითდაჯერებულობა ერთ-ერთი მიზეზი იყო იმისა, როგორც ვითარდებოდა და როგორც ხდებოდა ურთიერთობა საზოგადოებასთან. ამის კარგი გამოხატულება გახლდათ თუნდაც პირველ ტურში შედეგები, რამდენსაც ველოდებოდით. რა თქმა უნდა, მე ვიყავი ჩართული, მაგრამ ისევ ძველ გუნდსა და ძველ ინფორმაციაზე დაყრდნობით, გუნდი იმ დონეზე იყო დარწმუნებული საკუთარ ძალებში, რომ პროფესიონალური კვლევებიც კი არ ჩაუტარებიათ. რეალურად, პარტიული რესურსით ახერხებდნენ კვლევების ჩატარებას და ასეთი ცდომილება იყო სირცხვილი. ეგზიტპოლების შემდეგ მეც კი გამომიყვანეს, ეს იყო სირცხვილი. ძალიან მკაცრი საუბარი მქონდა ამის შემდეგ. მოლოდინი ჰქონდათ აბსოლუტურად აცდენილი რეალობასთან, 14 პროცენტი სხვაობა სირცხვილია, ამას კვლევა აღარ ჰქვია“, – განაცხადა ბიძინა ივანიშვილმა.