საპატრიარქოს პრესცენტრი განმარტებას აკეთებს სოციალურ ქსელში გავრცელებული ინფორმაციასთან დაკავშირებით, რომლის მიხედვითაც ილია II ქადაგებისას ინიციატივით გამოვიდა და ეკლესიის წინამძღვრებს მოუწოდა, რომ „ეკლესიების კარი ყოველ ღამით გაიღოს უსახლკარო ადამიანების შესაფარებლად".
საპატრიარქოს პრესცენტრის ხელმძღვანელი დეკანოზმა ანდრია ჯაღმაიძე განმართავს, რომაღნიშნული ინფორმაცია სიმართლეს არ შეესაბამება და ილია მეორეს ასეთი რამ არ უთქვამს. მისი თქმით, ეკლესია არ შეიძლება თავშესაფრად მოეწყოს და გადაკეთდეს თავშესაფრად.
„ინტერნეტსივრცეში ხშირად ხდება, რომ ვრცელდება არაზუსტი ინფორმაცია ეკლესიის შესახებ და ამას მოსდევს ხოლმე ძალიან არასწორი ინტერპრეტაციები. ასე მოხდა გუშინაც, გავრცელდა ინფორმაცია თითქოს პატრიარქი ამბობს, რომ ეკლესიები შეიძლება მოეწყოს უსახლკაროთა თავშესაფრებად. ეს არ შეესაბამება სიმართლეს. მის უწმინდესობას ასეთი რამ არ უთქვამს. ელემენტარულია, რომ ეკლესია არ შეიძლება თავშესაფრად მოეწყოს და გადაკეთდეს თავშესაფრად. ეკლესიას აქვს თავისი მისია. ასეთი განცხადებები, მით უმეტეს, პატრიარქის სახელით უნებლიედ ან მიზამნიმართულად ემსახურება ცრუ, არასწორი მოლოდინების გაჩენას და იმ ღვაწლზე ჩრდილის მიყენებას, რასაც ეკლესია სოციალური მსახურების კუთხით მრავალი წელია ეწევა", - ამბობს დეკანოზი ანდრია ჯაღმაიძე.
