საპრეზიდენტო არჩევნების მეორე ტურში მკაფიოდ გამოიკვეთა არჩევანი, ეს არის არჩევანი საბჭოთა გადმონაშთსა და ევროპულ მომავალს შორის - ამის შესახებ პოეტმა, დავით მაღრაძემ ბათუმში მოძრაობა „მე ვიცავ თავისუფლებას“ შეხვედრაზე განაცხადა.
„ჩვენ არაერთხელ ვთქვით, მხარს ვუჭერთ სიმშვიდეს, საზოგადოების ევოლუციურ განვითარებას. ევროპული არჩევანი არის ჩვენი არჩევანი, რომლიც არც მინდა, არასდროს იყოს სათუო. წარმოდგენილია ერთი კანდიდატი დაბადებული, გაზრდილი ევროპაში, შენარჩუნებული თავისი მშობლიური ენით, რომელმაც თავისი მამა-პაპით გადაარჩინა ოჯახში ქართული ენა. მათმა წინაპრებმა არ მიიღეს ორმაგი მოქალაქეობაც კი, საფრანგეთის მოქალაქეობაზე თქვეს უარი. მოიტანეს თავისი თავი, თავისი მამულიშვილობა, თავისი მშვენიერებით. მეორე მხარეს საბჭოთა გადმონაშთი ამხანაგი ვაშაძე დგას, საბჭოთა რუსეთის გადმონაშთი, საბჭოთა რუსეთის ოფიციალური თანამშრომელი, რომელიც გვიცხადებს, რომ თურმე ეიფელის კოშკი არ არის პარიზი და თურმე არის კრემლის ვარსკვლავი, სადაც თვითონ გაიზარდა და დაიბადა. ასეთი შეურაცხმყოფელი აღვირახსნილი კამპანია აქვს გაჩაღებული”, – განაცხადა დავით მაღრაძემ.