რუსთაველის გამზირზე, პარლამენტის შენობის წინ, შვილმოკლული მამების, ზაზა სარალიძისა და მალხაზ მაჩალიკაშვილის აქციაზე ინციდენტი მოხდა. შელაპარაკება აქციის მონაწილეებსა და სამართალდამცავებს შორის, კვლავ კარვის გაშლას მოჰყვა.
როგორც „ჯი-ეიჩ-ენთან“ ზაზა სარალიძე აცხადებს, მას კვლავ წვიმაში ყოფნა უწევს, რადგან სამართალდამცავებმა მას კარავის გაშლის უფლება არ მისცეს.
„პოლიციას ჩემთვის ნათქვამი ჰქონდა, წვიმის დროს, პარლამენტის შენობაში შეგიშვებთ, გადახურულშიო. ჯებირები გაგვიხსნეს, შეგვიშვეს, მაგრამ იქიდან დაცვის სამსახურმა გამოგვყარა და ისევ წვიმაში აღმოვჩნდით. მანქანაში კარავი მქონდა, ვიფიქრე, სანამ წვიმაა, გავშლი და მერე ავკეცავ ისევ-მეთქი, მაგრამ არც ამის საშუალება არ მომცეს. ამის ფონზე შელაპარაკება მოხდა საპატრულო პოლიციასთან. არც შიგნით შემიშვეს, არც კარავი გამაშლევინეს. რატომ გვიკრძალავენ, თვითონაც არ იციან. ვარ ისევ ღია ცის ქვეშ და ისევ დავსველდები ალბათ. სახალხო დამცველი გამოვიძახეთ, ოქმი შეადგინა, ვნახოთ, რა რეაგირება მოჰყვება“, - აცხადებს სარალიძე.
