„ექსპორტის მაჩვენებლების გაუმჯობესება განპირობებულია ქვეყანაში ვაჭრობისათვის ხელსაყრელი გარემოს შენარჩუნებით და შეღავათიანი და თავისუფალი სავაჭრო რეჟიმების ამოქმედების შედეგად შემცირებული საბაჟო ტარიფებით. განსაკუთრებით აღსანიშნავია ისეთი პროდუქციის ექსპორტის ზრდა რომელიც აქამდე ევროკავშირში იბეგრებოდა და გათავისუფლდა იმპორტის გადასახადისგან მხოლოდ თავისუფალი ვაჭრობის ამოქმედების შედეგად, ასეთია მაგალითად ღვინის პროდუქტები,” - განაცხადა ექსპორტის განვითარების ასოციაციის მრჩეველთა საბჭოს თავმჯდომარემ გვანცა მელაძემ.
„საქსტატის“ მონაცემებით, 2018 წლის სექტემბერში წინა წელთან შედარებით ექსპორტის 17.1 პროცენტიანი ზრდა დაფიქსირდა და მისმა მოცულობამ 301.7 მლნ. აშშ. დოლარი შეადგინა, ხოლო 2018 წლის იანვარ-სექტემბერში ექსპორტი 25.7 პროცენტით გაიზარდა და 2 448.1 მლნ. აშშ. დოლარს მიაღწია. მნიშვნელოვანია, რომ ექსპორტი ევროკავშირის ქვეყნებში 13.2%-ით გაიზარდა და 533.0 მლნ. აშშ. დოლარი შეადგინა.
გვანცა მელაძის განცხადებით, ასევე ყურადსაღებოა უკანასკნელ წლებში საკმაოდ შემცირებული მსუბუქი ავტომობილების რეექსპორტის ზრდა, რაც გამოწვეული ტრადიციული საექსპორტო ბაზრების და ასევე სამიზნე სეგმენტის დივერსიფიცირებით.
„გარკვეული პროდუქციის წარმოების მოცულობების ზრდა აღინიშნა საშუალო ზომის საწარმოთა შორისაც, რაც ჯერჯერობით მსხვილ სტატისტიკურ მონაცემებში იჩრდილება, მაგრამ არ შეიძლება ამ ტენდენციის იგნორირება, რადგან მნიშვნელოვანია ექსპორტში მეტად მონაწილეობდეს მცირე და საშუალო ბიზნესი. ამ სეგმენტის განვითარება მეტწილად უკავშირდება სახელმწიფოს მიერ უკანასკნელ წლებში წარმოების და ექსპორტის ხელშეწყობის კუთხით ჩადებულ ინვესტიციებს, რომელსაც სწორედ ახლა აქვს უკუგება,“ - განაცხადა ექსპორტის განვითარების ასოციაციის მრჩეველთა საბჭოს თავმჯდომარემ გვანცა მელაძემ.