ბადრი პატარკაციშვილის ოჯახი პროკურატურაში გამართულ დღევანდელ ბრიფინგთან დაკავშირებით, რომელიც პატარკაციშვილის მკვლელობის მომზადების საქმეს ეხებოდა, განცხადებას ავრცელებს.
პატარკაციშვილის ოჯახი სრულყოფილი გამოძიების უმოკლეს დროში დასრულებას ითხოვს.
„იმის მიუხედავად, რომ გამოძიება უკვე ძალიან დიდი ხანია, გრძელდება, პროკურატურის დღევანდელი ბრიფინგი იყო ძლიერი შოკი ჩვენი ოჯახისთვის. ძნელია, გადმოსცე, რას გრძნობს ოჯახი, რომელმაც დაკარგა ბადრი, მაშინ, როდესაც ეთერით ვისმენთ საუბრებს იმის შესახებ, თუ როგორ იგეგმებოდა მისი მკვლელობა.
მოვითხოვთ სრულყოფილი გამოძიების უმოკლეს დროში დასრულებას და ვიმედოვნებთ, რომ ყველა, ვინც ამ ბოროტებას გეგმავდა, მკვლელობის დამკვეთებიდან დაწყებული, შემსრულებლებით დამთავრებული, სრული სიმკაცრით აგებს პასუხს, როგორც კანონის, ასევე, თავის დროზე, ღმერთის წინაშე“, – ნათქვამია ბადრი პატარკაციშვილის ოჯახის განცხადებაში.
ცნობისთვის, პროკურატურის ინფორმაციით, ბადრი პატარკაციშვილის მკვლელობის მომზადების ფაქტი გახსნილია.
