დღეს დაკითხულმა მოწმემ შემთხვევის ადგილი დაათვალიერა. მან მოპოვებულ ნივთიერ მტკიცებულებებზე ისაუბრა, რომელსაც შემდეგ საექსპერტო კვლევა ჩაუტარდა. მან სასამართლოს მნიშვნელოვანი ინფორმაცია მიაწოდა იმასთან დაკავშირებით, რომ შემთხვევის ადგილზე ამოღებული იყო ორი სხვადასხვა ფორმის და მონაცემის მასრა, რაც ცალსახად მოწმობს იმაზე, რომ ორივე ბრალდებული ცალ-ცალკე სხვადახვა იარაღით იყო შეიარაღებული, - აცხადებს დავით ქმოსტელის მკვლელობის საქმის პროკურორი, ლაშა ბიწაძე.
მისი განმარტებით, დღეს დაკითხულმა სხვა მოწმემ დაადასტურა, რომ მკვლელს სახე ნიღბით ჰქონდა დაფარული და ის სახლის შესასვლელთან სროლის დაწყებამდე დაინახა.
"დღეს დაიკითხა სამი მოწმე, მათგან ერთ-ერთი გია სურამელაშვილია. როგორც მოგეხსენებათ, ბრალდებულებს ბრალი წაყენებული აქვთ არამხოლოდ ჯგუფურად ჩადენილ განზრახ მკვლელობაში, არამედ დამამძიმებელ გარემოებაში ჩადენილი კვალიფიკაციითაც. რაც გულისხმობს მკვლელობის ჩადენას ისეთი საშუალებით, რაც სხვათა სიცოცხლეს განზრახ უქმნის საფრთხეს.
როგორც სასამართლო პროცესზე გამოკვლეული მტკიცებულებებით, მოწმეთა ჩვენებით დადასტურდა, შემთხვევის ადგილზე ინტენსიური გასროლები იყო. დაზარალებული გია სურამელაშვილი მოკლულის გვერდით მოდიოდა, რითიც ბრალდებულებმა განზრახ საფრთხე შეუქმნეს სურამელაშვილის სიცოცხლესა და ჯანმრთელობას.
აღნიშნულმა პიროვნებამ დაადასტურა, რომ ბრალდებულს სახე ნიღბით ჰქონდა დაფარული. მან ერთ-ერთი ბრალდებული პირველად შემოსასვლელ კარში დაინახა, ის შეიარაღებული იყო. მან თვალებზე ხელი აიფარა და იქვე ხეს მოეფარა. შემდგომში განვითარებული მოვლენები აღარ დაუნახავს, თუმცა, ესმოდა ინტენსიური სროლები.
ბრალდების მხარემ ნათლად წარმოაჩინა, რომ მისთვის გარკვეულწილად ცნობილი იყო ბრალდებულების შემხებლობა ამ საქმესთან, თუმცა, მან შეგნებულად აარიდა თავი ამ პასუხის გაცემას. სასამართლოში წარმოდგენილი სხვა მტკიცებულებები ცალსახად საკმარისია, რომ ბრალდებულების მიერ ჩადენილი დანაშაულებრივი ქმედება დადასტურებული იყოს", - აცხადებს ბიწაძე.
შეგახსენებთ, რომ თბილისში, ნაძალადევის რაიონში, 4 თებერვალს, დავით ქმოსტელი, იგივე ძივითა მოკლეს. ის მკვლელობის დღეს ნათესავთან იმყოფებოდა. სწორედ იქიდან გამოსულს ესროლეს მას.
მკვლელობიდან მეორე დღეს, სამართალდამცავებმა ლევან ყანდორელაშვილი და გიგა ჭალელიშვილი დააკავეს.
დაკავებულები ბრალს არ აღიარებენ.
გამოძიების ინფორმაციით, ბრალდებულებს კონფლიქტი ჰქონდათ მოკლულთან. დაცვის მხარის ინფორმაციით კი, ეს სიმართლეს არ შეესაბამება და ბრალდებულთაგან ერთი პირი მოკლულს საერთოდ არც იცნობდა. მათივე ცნობით, ბრალდების მხარეს საქმეში მტკიცებულებები არ აქვს.