თბილისის საქალაქო სასამართლოში ნაფიცი მსაჯულების მონაწილეობით, ნაძალადევის რაიონში დავით ქმოსტელის მკვლელობის საქმის განხილვა მიმდინარეობდა.
სასამართლოში ჩვენება სამმა მოწმემ მისცა. ერთ-ერთი მათგანი, გია სურამელაშვილი მკვლელობის ღამეს მეზობლის სახლში ქმოსტელთან ერთად იმყოფებოდა. როგორც ერთ-ერთი ბრალდებულის, ლევან ყანდორელაშვილის ადვოკატი, სულხან კომახიძე აცხადებს, სურამელაშვილმა ვერ დაადასტურა, რომ მკვლელობა ბრალდებულმა ჩაიდინა.
"დღეს დაკითხულმა მოწმეებმა როგორც მოსალოდნელი იყო, ვერაფერზე ისაუბრეს. თვითმხილველი მოწმე გია სურამელაშვილი, რომელიც ბავშვობიდან იცნობს ბრალდებულ ლევან ყანდორელაშვილს, მას რაც არ უნდა ნიღაბი ჰქონოდა, აუცილებლად იტყოდა, მსროლელი ის რომ ყოფილიყო. შესაბამისად, ლევანი არ ყოფილა იქ.
მისი ჩვენებით, მარტო ერთი კაცი იყო მოსაკლავად მისული და არა ორი, როგორც ამას ბრალდება ამბობს", - აცხადებს კომახიძე.
მისი განმარტებით, შემთხვევის ადგილზე გადაღებული ფოტოები საქმეში სრულად წარდგენილი არ არის.
"გამომძიებელმა ვერ გასცა პასუხი, თუ რატომ აკლია საქმეში შემთხვევის ადგილზე გადაღებული ფოტოები. ექსპერტი შემთხვევის ადგილზე რომ გადაიღებს ფოტოს, ის სრულად უნდა იყოს საქმეში. ამ საქმეში კი, 19 ფოტო არ დევს. ისმის კითხვა, რა ფოტოები იყო და რატომ არ დევს? ამაზე პასუხი ბრალდების მხარემ უნდა გასცეს. სავარაუდოდ,დაცვის მხარის სასარგებლო მტკიცებულებები იყო აღბეჭდილი და ამიტომ არ ჩაიდო საქმეში", - დასძენს ადვოკატი.
შეგახსენებთ, რომ თბილისში, ნაძალადევის რაიონში, 4 თებერვალს, დავით ქმოსტელი, იგივე ძივითა მოკლეს. ის მკვლელობის დღეს ნათესავთან იმყოფებოდა. სწორედ იქიდან გამოსულს ესროლეს მას.
მკვლელობიდან მეორე დღეს, სამართალდამცავებმა ლევან ყანდორელაშვილი და გიგა ჭალელიშვილი დააკავეს.
დაკავებულები ბრალს არ აღიარებენ.
გამოძიების ინფორმაციით, ბრალდებულებს კონფლიქტი ჰქონდათ მოკლულთან. დაცვის მხარის ინფორმაციით კი, ეს სიმართლეს არ შეესაბამება და ბრალდებულთაგან ერთი პირი მოკლულს საერთოდ არც იცნობდა. მათივე ცნობით, ბრალდების მხარეს საქმეში მტკიცებულებები არ აქვს.