საქართველოს პარლამენტის ადამიანის უფლებათა დაცვის კომიტეტის თავმჯდომარე სოფო კილაძე მთავრობის სხდომის მოწვევის თაობაზე პრეზიდენტ გიორგი მარგველაშვილის ინიციატივას არაადეკვატურად მიიჩნევს.
მისი თქმით, საზოგადოებას პრეზიდენტისგან არაადეკვატური განცხადება არაერთხელ უნახავს და დღევანდელი მოთხოვნაც ამის მაგალითია.
„ქართული ოცნების“ წინააღმდეგ მყოფი ძალები ქვეყანაში აპოკალიფსის დახატვას ცდილობენ, თითქოს, ბანდები დათარეშობენ და ასე შემდეგ. საზოგადოებაში განცდა არ არის, რომ ქვეყანაში უკონტროლო ბანდები დათარეშობენ. ასეთი სახის დარღვევების პირველი ინდიკატორი საზოგადოებაა, რომელმაც არჩევნებზე ნდობა გამოგვიცხადა“, – განაცხადა კილაძემ.
ცნობისთვის, დღეს გიორგი მარგველაშვილმა პრემიერ-მინისტრ მამუკა ბახტაძეს შესთავაზა, უახლოეს დღეებში მთავრობის სხდომა პრეზიდენტის მონაწილეობით გაიმართოს.