მირზა სუბელიანთან დაკავშირებით გავრცელებულ ჩანაწერებზე გამოკითხვები გუშინაც მიმდინარეობდა და გამოძიება გაგრძელდება, – ამის შესახებ იუსტიციის მინისტრმა თეა წულუკიანმა "რუსთავი 2"-ის მიერ გავრცელებულ ჩანაწერებთან დაკავშირებით განაცხადა.
მისი თქმით, როდის გაკეთდა ეს ჩანაწერი, ვის მიერ არის გაკეთებული, გამოტანილი, თუ ამგვარი ჩანაწერი საერთოდ გაკეთდა ციხის კედლებში, არის თუ არა ავთენტური, ამის თაობაზე პროკურატურამ გაავრცელა განცხადება. მისივე ინფორმაციით, სამი დღის წინ არის გამოძიება დაწყებული.
„მხოლოდ ის შემიძლია გითხრათ, რომ გუშინაც კი მიმდინარეობდა დაკითხვები და გამოძიება გაგრძელდება. იმედი მაქვს, პროკურატურა სრული გამჭვირვალობის პირობებში საზოგადოებას შეატყობინებს გამოძიების მიმდინარეობის შესახებ“,- განაცხადა თეა წულუკიანმა.
მან დეპუტატ ვიქტორ ჯაფარიძის სასჯელაღსრულების დაწესებულებაში შესვლაზე დასმულ შეკითხვასაც უპასუხა.
„სასჯელაღსრულების სისტემაში ასე იყო მუდამ და ასეა მას მერეც, რაც იუსტიციის სამინისტრო შემოუერთდა – საქართველოს პარლამენტის დეპუტატები, რომელი პარტიის წარმომადგენელიც არ უნდა იყოს, პარლამენტის თავმჯდომარის ნებართვით შედიან და ნახულობენ მათთვის სასურველ პატიმრებს. ჩვენ არ გვაქვს უფლება, ხელი შევუშალოთ ამ ვიზიტებს,“,- აღნიშნა თეა წულუკიანმა.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.