"ევროპული საქართველო" "რუსთავი 2"-ის მიერ გავრცელებულ აუდიოჩანაწერთან დაკავშრებით, შინაგან საქმეთა მინისტრსა და მთავარ პროკურორს პარლამენტში იბარებს.
პარტიის წევრის, სერგი კაპანაძის განცხადებით, ეს არის საკითხი, რომელიც არის ყველაზე მნიშვნელოვანი დღეს საქართველოში და ამასთან დაკავშირებით დუმილი არის სრულიად მიუღებელი.
„უახლოეს პერიოდში, შს მინისტრი, მთავარი პროკურორი გამოცხადდნენ პარლამენტში, როგორც ეს დაადგინა საგამოძიებო კომისიამ და პასუხი გასცენ იმ კითხვებს, რომელიც დაისვა საგამოძიებო კომისიის მიერ და იმ კითხვებს, რომლებიც კიდევ უფრო გამძაფრდა ამ ჩანაწერების მერე. ეს არის საკითხი, რომელიც არის ყველაზე მნიშვნელოვანი დღეს საქართველოში და ამასთან დაკავშირებით დუმილი არის სრულიად მიუღებელი", - განაცხადა კაპანაძემ.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.
