არ მინდა თავი ვინმეს პირად პატიმრად ჩავთვალო. მე ასე დაბალ დონედ არ მიმაჩნია თავი, - განაცხადა საქართველოს ყოფილმა შს მინისტრმა ვანო მერაბიშვილმა რუსთავი 2-თან ინტერვიუში.
"მთელი ხელისუფლება ეს არის პრაქტიკულად ერთი ადამიანი. მთელი ხელისუფლება სწორედ ერთ ადამიანს ემსახურება. თუმცა მე არ მინდა თავი ვინმეს პირად პატიმრად ჩავთვალო. მე ასე დაბალ დონედ არ მიმაჩნია თავი. ხელისუფლების ინტერესებშია, რომ მაქსიმალურად იზოლირებული ვიყო, რომ მათ არ შეექმნათ საფრთხე", - ამბობს მერაბიშვილი და აღნიშნავს, მის მეგობრებს ეჭვი აქვთ რომ მოწამლეს.
„მე სიმპტომებს როდესაც მეუბნებიან, მეუბნებიან, რომ ამის გამომწვევი მიზეზი არის ინფექცია, რომელიც დადგენილი არ არის. მათი სიტყვები იწვევს გარკვეულ ეჭვს ჩემს მეგობრებში.თუ ვიღაც ჩემს მოწამვლას აპირებდა, დარწმუნებული ვარ, რომ, მარტივი დარიშხანით ან საწამლავით არ მომწამლავენ, იმიტომ, რომ მისი სიმპტომები ადვილად დასადგენია. ალბათ საზოგადოებისთვის ცნობილია რამდენი საუბარი მიდის დღეს ნერვულ პარალიზებაზე თუ საწამლავზე და ა.შ. საერთოდ მსგავსი მოწამვლა თუ იქნებოდა, ამის დადგენა რთული იქნებოდა.
მაგალითისათვის, თუ გახსოვთ, უკრაინის ყოფილი პრეზიდენტი იუშენკო როდესაც მოწამლეს, მიუხედავად იმისა, რომ მან მკურნალობა გაიარა მოწინავე კლინიკებში და დღემდე არ არის დადგენილი მოწამვლის საშუალება. მაგრამ მთავარი ეს არ არის, მთავარია ის, რომ ვიცოდე რომ მე ხვალ მომწამლავენ, გამაფრთხილეს, ეს მე მაინც ვერ გამტეხავდა და მაინც არ შემაცვლევინებს ჩემს პრინციპებს და მაინც, ასე ვთქვათ, მე მსგავსი რაღაცებისთვის მზად ვარ. როდესაც ადამიანი ირჩევ აქტიურ პოლიტიკას და გარგუნა ბედმა, რომ იყო ლიდერებს შორის, მზად უნდა იყო ყველაფრისთვის”, - თქვა მერაბიშვილმა.