"ევროპული საქართველოს" ლიდერის გიგი უგულავას ინფორმაციით, მმართველი გუნდი კიდევ რამდენიმე ადამიანმა დატოვა.
როგორც დღევანდელ ბრიფინზე გიგი უგულავამ განაცხადა, "ქართული ოცნების" კოორდინატორები რუსთავიდან, გარდაბნიდან, დმანისიდან და წალკიდან "ევროპულ საქართველოს" შეუერთდნენ.
„ორი კვირაა დარჩენილი არჩევნებამდე და "ქართული ოცნებიდან" სხვადასხვა თანამდებობის პირების, სხვადასხვა ადამიანების „ქართული ოცნების“ დატოვების პროცესი გრძელდება. მას შეუქცევადი ხასიათი აქვს“, - განაცხადა უგულავამ.
მისი თქმით, ეს ადამიანები წარსულში პოლიტიკურად დაპირისპირებულები იყვნენ „ევროპულ საქართველოსთან“ და „ქართულ ოცნებას“ წარმოადგენდნენ.
„ეს ადამიანები, წარსულში, პირდაპირ პოლიტიკურად დაპირისპირებულები იყვნენ ჩვენთან, ჩვენ სხვადასხვა ნაპირზე ვიდექით, ბევრი რამე განგვასხვავებდა, მაგრამ საერთო გვქონდა ერთი - ჩვენი ქვეყნის უკეთესი ხვალინდელი დღე და უკეთესი ხვალინდელი დღისთვის ბრძოლა“, - აღნიშნა გიგი უგულავამ.
ცნობისთვის, გურიიდან "ქართული ოცნების" აქტივისტები, კოორდინატორები და ზონის უფროსები "ევროპულ საქართველოს" 11 ოქტომბერსაც შეუერთდნენ. თუმცა მაშინ ჩოხატაური-ლანჩხუთის მაჟორიტარმა დეპუტატმა ნინო წილოსანმა გურიაში „ქართული ოცნების“ წევრების „ევროპულ საქართველოში“ გადასვლის შესახებ გიგი უგულავას გავრცელებული ინფორმაცია უარყო.