ტურისტული კომპანია „Travelshop“ის გენერალური მენეჯერის, ნიკოლოზ მანჯგალაძის განცხადებით, პორტალ NUMBEO-ს უსაფრთხო ქვეყნების საერთაშორისო რეიტინგში საქართველოს მეხუთე ადგილზე დაწინაურება მნიშვნელოვანია საქართველოს ტურიზმის სექტორის განვითარების თვალსაზრისით. „ეს რეიტინგი მნიშვნელოვანია, განსაკუთრებით აზიური ბაზრებისთვის, როგორიც არის მაგალითად, სინგაპური, კორეა, ჰონგ-კონგი დაა. შ. - რომლებიც განსაკუთრებით დიდ მნიშვნელობას ანიჭებენ მსგავსი ტიპის რეიტინგებს. მსგავსი შეფასებები ასევე მნიშვნელოვანია სკანდინავიის ქვეყნებისთვისაც“, - აღნიშნა მან.
ამასთან, ნიკოლოზ მანჯგალაძის შეფასებით, ზოგადად საქართველოში ტურისტული გარემო პოზიტიურია. თუმცა, მისივე აზრით, სექტორში ბევრი რამ დასახვეწია. მისი თქმით: „ბევრი რაღაც არის დასახვეწი, სერვისი პირველ რიგში, მაგრამ ზრდადი დარგია და იმის გამო, რომ ჯერ ასე ვთქვათ, ახალი ტურისტული მიმართულება ვართ, ვფიქრობ, დროთა განმავლობაში ბევრი რამე დაიხვეწება“.