„იბერია“ ბავშვობაში მახსოვს და ახლა გავიგონე, რომ ასეთი ტელეკომპანია არის, ბოდიშს ვიხდი, - ამის შესახებ სახელმწიფო დაცვის სპეციალური სამსახურის ხელმძღვანელმა ანზორ ჩუბინიძემ ტელეკომპანია „იბერიასთან“ დაკავშირებით განაცხადა.
ის მის წინააღმდეგ გაჟღერებულ ყველა ბრალდებას უარყოფს.
„სამარცხვინოც კი არის, რომ ამ საკითხზე კომენტარი გავაკეთო. არანაირი კავშირი არ მქონია და არ მექნება ასეთ დალაგების მექანიზმებთან. როცა პროკურატურაში გაირკვევა ეს საკითხი, დიდი ალბათობით ჩემთან მიმართებაში კითხვები არც იქნება. სიგარეტის მომხმარებელი არ ვარ და არც „ომეგასთან“ დაკავშირებით არასოდეს არაფერი მსმენია. ბიზნესმენ ზაზა ოქუაშვილსაც არ ვიცნობ. მთელ ჩემს სამსახურეობრივ კარიერას ვდებ სასწორზე და ვამბობ - არანაირ მსგავს გარიგებაში მონაწილეობა არ მიმიღია. მზად ვარ, მივიდე ნებისმიერ ადგილას და გავცე ნებისმიერ კითხვას პასუხი“, - განაცხადა ანზორ ჩუბინიძემ.
ცნობისთვის, "რუსთავი 2"-ის ინფორმაციით, აღნიშნულ საქმესთან დაკავშირებით, საქართველოს ხელისუფლების ყოფილ და მოქმედ მაღალჩინოსნებს, მათ შორის ანზორ ჩუბინიძეს, ლონდონის სასამართლოში დაკითხვაზე იბარებენ.