სააფთიაქო ნარკომანიის საქმეზე ბრალდებული 6 პირიდან ერთ-ერთს, ჯანდაცვის სამინისტროს სახელმწიფო სამედიცინო საქმიანობის რეგულირების სააგენტოს ყოფილ თავმჯდომარეს, გია თვალავაძეს ექიმები და საზოგადო მოღვაწეები თავდებში უდგებიან.
მისი თავდებით გათავისუფლების შუამდგომლობა სასამართლო სხდომაზე თვალავაძის ადვოკატმა ლალი აფციაურმა დააყენა.
მისი განმარტებით, ბრალდების მხარის მიერ დასახელებული პატიმრობის გამოყენების საფუძვლები დაუსაბუთებელია.
ამასთან ლალი აფციაურის თქმით თვალავაძეს გულთან დაკავშირებული პრობლემები აწუხებს და აღკვეთის ღონისძიების შერჩევისას მისი ჯანმრთელობის მდგომარეობაც გასათვალისწინებელია.
შეგახსენებთ, რომ სუს-მა ე.წ. სააფთიაქო ნარკომანიის სფეროში ფსიქოტროპული საშუალებების უკანონო ბრუნვის საქმეზე სამსახურებრივი უფლებამოსილების ბოროტად გამოყენების ფაქტზე ჯანდაცვის სამინისტროს სსიპ სამედიცინო საქმიანობის სახელმწიფო რეგულირების სააგენტოს უფროსი გია თვალავაძე დააკავა. ასევე, ბრალდებულის სახით დაკავებულები არიან უკანონო სამეწარმეო საქმიანობაში ჩართული კიდევ 5 პირი.