უკვე დაიწყეს ალბათ, მერიაში თეთრი საღებავების ბიზნესის აწყობა, - ამის შესახებ ფრაქცია "ნაციონალური მოძრაობის" თავმჯდომარე რომან გოცირიძემ ტაქსების რეგულაციებთან დაკავშირებით განაცხადა.
ის მიიჩნევს, რომ თბილისის მერიის გადაწყვეტილება, მომავალი წლის ოქტომბრიდან ყველა ტაქსი თეთრად გადაიღებოს, კორუფციულია.
"თუ მანქანების გარეგნულ სახეზე ზრუნავენ, ვის გაუგია, რომ ასე ერთბაშად აიძულო ყველა ტაქსის მძღოლი ამოდენა ხარჯები გაიღოს. ან საიდან ეს ფული?! ეს ეტაპობრივად უნდა გაკეთებულიყო, ვთქვათ სამი წლის განმავლობაში, თუმცა ზოგადად ასეთი მიდგომა მცდარია. უკვე დაიწყეს ალბათ, მერიაში თეთრი საღებავების ბიზნესის აწყობა. ტაქსის ნიშნის მერიის მიერ უფასოდ დარიგებაც უაზრობაა და ასევე კორუფციის სუნი ასდის. ვიღაცა შემოიტანს რამდენიმე ათეულ ათასს და ქალაქის ბიუჯეტი შეისყიდის.
ტენდერები როგორ ტარდება, კი ვიცით", - განაცხადა გოცირიძემ.
ცნობისთვის, რეგულაციების თანახმად, 2019 წლის ოქტომბრიდან თბილისში მხოლოდ თეთრი ფერის ტაქსები იმოძრავებენ.