პარლამენტის თავმჯდომარის ირაკლი კობახიძის განცხადებით, კანაფთან დაკავშირებული ინიციატივის სარგებელი არის ის, რომ ექსპორტი მილიარდი დოლარით გაიზრდება.
როგორც "ტვ პირველის" გადაცემა "რეაქციაში" კობახიძემ აღნიშნა, "კანაფის კონტროლის შესახებ“ კანონპროექტი პარლამენტიდან რომ გაიწვიონ, გამოვა, რომ რაღაც ცუდს აკეთებდნენ. მისივე თქმით, მთავრობას სურს, ამ თემაზე საზოგადოებასა და ეკლესიას ესაუბროს.
"მნიშვნელოვანია საზოგადოებამ იცოდეს, რომ ნარკოტიკებს არ ვაწარმოებთ და ამის გადინების საფრთხე არ არსებობს. რაც შეეხება ეფექტს, ძალიან წარმატებული ეკონომიკის პირობებშიც, სიღარიბის აღმოფხვრას რვა - ათი წელი სჭირდება. ჩვენი ერთ-ერთი მთავარი ამოცანაა, რომ თუკი რაიმე იმის საშუალებას იძლევა, რომ ათი წლის მაგივრად, ეს რვა-შვიდ წელიწადში გავაკეთოთ, რატომ არ უნდა გამოვიყენოთ ეს საშუალება, იმ პირობებში, როცა საზოგადოებას ზიანაც არ ადგება?!“, - განაცხადა ირაკლი კობახიძემ.