თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის ინიციატივით დაფუძნებული სპორტული ფესტივალი „თბი-ლისი“ გრძელდება.
22 სექტემბერს, 12:00 საათიდან, ლისის ტბის მიმდებარე ტერიტორიაზე, სპორტის სხვადასხვა სახეობაში შეჯიბრებები გაიმართება, რომელშიც მონაწილეობის საშუალება ნებისმიერ მსურველს ექნება. სპორტულ პროგრამებში მონაწილეობის მსურველთა რეგისტრაცია ადგილზე მოხდება.
ფესტივალი, გარდა სპორტული აქტივობებისა, კულტურულ და საგანმანათლებლო ნაწილსაც მოიცავს. საფესტივალო დღეს გაიხსნება ART მარკეტი, Orbeti Green Space-ს სპორტულ-გასართობი კუთხე, ასევე, საბავშვო გასართობი კუთხე, გარდა ამისა, გაიმართება საქართველოში დამზადებული ხელნაკეთი ნივთების გამოფენა-გაყიდვა, საბავშვო კინოჩვენება, ფერების ფესტივალი და სხვა.
საფესტივალო დღეს, 18:00 საათზე დაასრულებს ჯგუფის - „არა“ კონცერტი, დიჯეი და ფოიერვერკი.
ფესტივალი ემსახურება ახალგაზრდებში ჯანსაღი ცხოვრების წესის დამკვიდრებას, მასობრივი სპორტის განვითარებას, სპორტის სხვადასხვა სახეობების პოპულარიზაციას, დასვენებისა და გართობისთვის სასურველი გარემოს შექმნას.