პირველი ინსტანციის მიერ გამოტანილი განაჩენი გაასაჩივრა ორივე მხარემ, როგორც დაცვის, ასევე ბრალდების მხარემ. დღეს თბილისის სააპელაციო სასამართლოში გრძელდება მოცემული საქმის განხილვა. ჩვენთვის უცნობია, თუ რა შუამდგომლობების დაყენებას აპირებს ბრალდების მხარე. ჩვენ მზად ვართ, სასამართლოს წინაშე წარმოვადგინოთ ჩვენი შესავალი სიტყვა, - აცხადებს ჟურნალისტებთან ხორავას ქუჩაზე მომხდარი მკვლელობის საქმეზე მსჯავრდებული გ.ჯ.-ს ადვოკატი, ტარიელ კაკაბაძე.
როგორც ის განმარტავს, საქალაქო სასამართლოს მიერ გამოტანილი განაჩენი დაუსაბუთებელია.
"ჩვენი სააპელაციო საჩივარი საქმეში არსებულ მტკიცებულებებს ეფუძნება. ჩვენ სრულად და ყოველმხრივად ვასაბუთებთ, რომ აღნიშნულ განაჩენში კონკრეტული კვალიფიკაცია არასწორია და სარჩელი არ გამომდინარეობს კანონმდებლობიდან. ბრალდების მხარის სააპელაციო საჩივარს, ვინაიდან ბრალდების მხარის სარჩელი აცდენილია საქმეში არსებულ მტკიცებულებებს, დაუსაბუთებელია და ის არ უნდა დაუშვან",- აცხადებს ადვოკატი.
ის ვარაუდობს, რომ პარლამენტის დროებითი საგამოძიებო კომისიის დასკვნა საქმეს, როგორც მტკიცებულება დაერთვება.
"რაც შეეხება, საგამოძიებო კომისიის დასკვნას, სავარაუდოდ, აღნიშნული დასკვნას, სისხლის სამართლის საქმეს დაერთვება, როგორც მტკიცებულება. მიგვაჩნია რომ აღნიშნული დასკვნა გარკვეულწილად მნიშვნელოვანია. ჩემთვის, როგორც იურისტისთვის მნიშვნელოვანია სასამართლოში გამოქვეყნებული, სასამართლოში მიცემული ჩვენებები, სწორედ ეს არის განმსაზღვრელი საქმეზე ობიექტური ჭეშმარიტების მისაღწევად. დიდი იმედი მაქვს, სააპელაციო სასამართლო სწორად შეაფასებს საქმეში არსებულ მტკიცებულებებს და დაადგენს სწორ კვალიფიკაციას", - აცხადებს კაკაბაძე.