თბილისის სააპელაციო სასამართლოში ხორავას ქუჩაზე მომხდარი მკვლელობის საქმის განხილვა დაიწყო. როგორც საქმის ახალი პროკურორი, თორნიკე ნადირაძე აცხადებს, საქმეში არსებული მტკიცებულებები ბრალდებულთა მიერ ჩადენილ დანაშაულზე მეტყველებს.
"ბრალდების მხარეს ექნება მყარი პოზიცია და ყურადღებას გაამახვილებს იმ მტკიცებულებებზე, რომლებიც ცალსახად მიუთითებს ბრალდებულების მიერ დამამძიმებელ გარემოებებში ჩადენილ მკვლელობაზე.
ბრალდების მხარე ნამდვილად წარადგენს ახალ მტკიცებულებებს, მათ შორის მოითხოვს საპროცესო დოკუმენტების, მოწმეების ჩვენების დართვას და ბუნებრივია, გვაქვს მოლოდინი, რომ აღნიშნული მტკიცებულებები, ნათელს მოჰფენს ძალიან ბევრ მნიშვნელოვან გარემოებას.
შემიძლია გითხრათ, რომ პროკურატურა მზადაა იმ შემთხვევაში, თუ გამოიკვეთება ნებისმიერი პირის პასუხისმგებლობის საკითხი, ის მიეცემა სისხლის სამართლის პასუხისგებაში", - აცხადებს ნადირაძე.