ბათუმის ცენტრალურ პარკში, ზოოკუთხე კარანტინის გამო მომდევნო სამი თვის განმავლობაშიც არ გაიხსნება. აჭარის საზოგადოებრივ მაუწყებელის ინფორმაციით, ზოოკუთხეში ცხოველების მკვდრადშობადობის ფაქტები დაფიქსირდა, რომლისმიზეზი სავარაუდოდ, პნევმონია და ვირუსული ინფექციებია.
კარანტინი მას შემდეგ გამოცხადდა, რაც აჭარის მაუწყებელმა ზოოკუთხეში 50-ე მეტი რქოსანი და პრიმატის დაცემის შესახებ გაავრცელა ინფორმაცია. მოგვიანებით, სიკვდილიანობის მზარდი სტატისტიკა მენეჯერებს შორის სასამართლო დავის საგანიც გახდა.
''ზოოპარკი იყო საკარანტინო პერიოდზე, ეს პროცესი ახლაც გრძელდება, დაკავშირებულია გარკვეულ პერიოდთან. როგორც წესი ხდება განსაკუთრებული ზრუნვა ცხოველების ჯანმრთელობაზე,'' - ამბობს ქალაქის მერი ლაშა კომახიძე.
ზოოკუთხის ახალი დირექტორი ირწმუნება, რომ ბოლო თვეებია ცხოველების დაცემის ფაქტი არა, თუმცა ავადობის გამო მკვდრადშობის ფაქტები დაფიქსირდა. გიორგი კალანდაძე ვარაუდობს, რომ საკარანტინო რეჟიმი კიდევ სამი თვე გაგრძელდება.
''არის ცხოველების კატეგორია, რომელთაც ჰქონდათ მიმდინარე ქრონიკული ინფექციური დაავადებები, რომელიც არ გადაეცემა ადამიანს, თუმცა საშიშია ზოოკუთხის გახსნა ვიზიტორების ჯანმრთელობისთვის, რადგან მიმდინარეობს ცხოველებზე მძიმე მკურნალობის კურსი და პარალელურად სარემონტო სამუშაოები,', - განმარტავს ზოოკუთხის ხელმძღვანელი გიორგი კალანდაძე.
ზოოკუთხის ყოფილი ხელმძღვანელი ალექსანდრე თევზაძე ირწმუნებოდა, რომ ცხოველები შეუსაბამო გარემოში ცხოვრობდნენ და ზოოპარკის გადატანის იდეა გაახმოვანა. იდეა ქალაქის მერს ლაშა კომახიძესაც მოეწონა და მალე ტერიტორიაზე მსუბუქი კონსტრუციებით კაფეების გახსნა დააანონსა.
კონცეფცია ჯერ არ არის, უცნობია რა დატვირთვას მიცემს რეკრეაციულ ზონაში გამოთავისუფლებულ ტერიტორიას ქალაქის მერია.
რაც შეეხება ზოოკუთხეს და დაავადებული ცხოველებს, მათი მოვლა და ახალი ზოოპარკის მოწყობა უკვე ბათუმის ბოტანიკური ბაღის პასუხისმგებლობაა. ადგილი და სავარაუდო მშენებელი ცნობილია, ჩაქვში ზოოპარკს ფონდი „ქართუ“ მოაწყობს. უცნობია მხოლოდ ის, როდის დაიწყება მშენებლობა და კიდევ რამდენ ხანს იქნებიან ცხოველები შეუსაბამო, არასათანადო პირობებში.