სსიპ ბათუმის ბულვარის ახალმა ხელმძღვანელმა, ბულვარის სრულ ტერიტორიაზე არსებული მდგომარეობის შესწავლა დილიდან დაიწყო.
ირაკლი ჯინჭარაძემ ადმინისტრაციის სტრუქტურული ერთეულების ხელმძღვანელებთან ერთად ბულვარის მთლიანი პერიმეტრი დაათვალიერა და მიმდინარე აგრონომიულ და ინფრასტრუქტურულ სამუშაოებს გაეცნო. თავდაპირველად, ახალი ხელმძღვანელი ანბანის კოშკთან ადმინისტრაციული სამსახურის, კერძოდ კი ინფრასტრუქტურულ პროექტებზე დასაქმებულ თანამშრომლებს შეხვდა და დაზიანებული ფილების მიმდინარე სარემონტო სამუშაოები დაათვალიერა.
„უპირველეს ყოვლისა, მნიშვნელოვანია ბულვარს სრულად ჰქონდეს მოწესრიგებული ინფრასტრუქტურა და არსებული პრობლემები უმოკლეს დროში აღმოიფხვრას, რათა არა მხოლოდ ტურისტულ სეზონზე, არამედ წლის დანარჩენ პერიოდებშიც ზღვისპირა ბულვარი კიდევ უფრო მიმზიდველი იყოს, როგორც ადგილობრივი, ასევე უცხოელი ვიზიტორებისათვის, ეს არის ჩვენი სამსახურის უპირველესი პრიორიტეტი“ -აღნიშნა ირაკლი ჯინჭარაძემ.
ძველი ბულვარის შემდეგ დირექტორმა ახალი ბულვარის ტერიტორია დაათვალიერა, იქ არსებულ ვითარებას გაეცნო, ადგილზე დასაქმებულ მუშახელს გაესაუბრა და მათ მიერ შესრულებული სამუშაოები მოინახულა.
ახალი ბულვარის ტერიტორიაზე აგრონომიული სამუშაოები რამდენიმე მიმართულებით მიმდინარეობს, კერძოდ: ხე-მცენარეებისა და მწვანე ნარგავების გასხვლა-გაცელვა, სავალი ბილიკების სარეველებისაგან გაწმენდა და ნიადაგის გაფხვიერება. პარალელურად, ირაკლი ჯინჭარაძემ „სკეიტ პარკი“-ს სარეკონსტრუქციო სამუშაოების პროცესს და პლაჟის გაწმენდით სამუშაოებსაც გაეცნო.
