პოლონეთის საგარეო უწყებიდან მოსკოვის საერთაშორისო ურთიერთობების სახელმწიფო ინსტიტუტის ყველა კურსდამთავრებული დაითხოვეს, - ამის შესახებ პოლონეთის საგარეო საქმეთა მინისტრმა, იაცეკ ჩაპუტოვიჩმა, პოლონეთის საგარეო საქმეთა სამინისტროს დიპლომატიურ აკადემიაში სიტყვით გამოსვლისას განაცხადა.
მისი თქმით, ბოლო წლებში სამსახურში აიყვანეს 435 ახალი თანამშრომელი და სამინისტრო დატოვეს მოსკოვის საერთაშორისო ურთიერთობათა ინსტუტიტის კურსდამთავრებულებმა და იმ ადამიანებმა ვინც თანამშრომლობდა კომუნისტურ უწყებებთან.
„შეიძლება ვთქვათ, რომ სამინისტროს გუნდი შეიცვალა თითქმის 100 პროცენტით. ახლა თანამდებობებზე ქვეყანაში და საზღვარგარეთ არ არის არავინ, ვინც იყო მოსკოვის საერთაშორისო ურთიერთობების სახელმწიფო ინსტიტუტის კურსდამთავრებული და ისინი, ვინც მუშაობდა კომუნისტურ უწყებებთან“, - განაცხადა იაცეკ ჩაპუტოვიჩმა, რომლის ციტატა „ტვიტერზე“ გამოქვეყნდა.
მინისტრის თქმით,როტაცია აუცილებელია ეფექტური მუშაობისათვის. ეს რეკომენდირებულია საჯარო სამსახურებისთვის და ევროპაში ჩვეულებრივი პრაქტიკაა. თუმცა, ჩაპუტოვიჩმა აღნიშნა, რომ თანამედროვე პოლონეთის შემთხვევაში, მნიშვნელოვანია "სახელმწიფო პოლიტიკის იდენტიფიცირება".