16 აგვისტოს, ღამის პირველ საათზე, თბილისში, პუშკინის ქუჩაზე მდებარე ერთ-ერთ ბარში აზერბაიჯანელ ტურისტ ელვინ ფარაჯს საფულე მოპარეს, სადაც მას პირადობის დამადასტურებელი მოწმობა, საკრედიტო ბარათი და ფული ჰქონდა.
როგორც დაზარალებული ტურისტი “ჯი-ეიჩ-ენს” უყვება, როდესაც შეამჩნია, რომ საფულე აღარ ჰქონდა, მან და ბარში მყოფმა სხვა სტუმრებმა ირგვლივ ძებნა დაიწყეს, თუმცა, ვერ იპოვეს.
მისივე თქმით, ერთ-ერთმა ქართველმა 112-ში დარეკა, პოლიცია მოვიდა, განცხადება დააწერინა და უთხრა, რომ დილით ბარში მდებარე კამერიდან ვიდეოჩანაწერებს ამოიღებდნენ.
ტურისტი ამბობს, რომ შემდეგ დილით ბარში მივიდა, სადაც უთხრეს, რომ კამერის ჩანაწერების ამოსაღებად არავინ მისულა.
“16 აგვისტოს, პუშკინის ქუჩაზე მდებარე “ვარშავა ბარში” ვიყავი. როცა ბართან მივედი, რათა კიდევ ერთხელ მეყიდა სასმელი, აღმოვაჩინე, რომ საფულე აღარ მქონდა. დავიწყეთ იმავე ტერიტორიაზე ძებნა, თუმცა, ვერსად ვიპოვეთ. იქვე მყოფმა ერთ-ერთმა ქართველმა პოლიციაში დარეკა. ისინი მოვიდნენ, განცხადება დამაწერინეს და დამპირდნენ, რომ შემდეგ დღეს ვიდეოჩანაწერებს ამოიღებდნენ. მეორე დღეს კვლავ მივედი ბარში, რათა გამერკვია, იყო თუ არა მისული პოლიცია, თუმცა, ბარმენმა მითხრა, რომ ვიდეოჩანაწერების ამოსაღებად არავინ მისულა. პოლიციამ დახმარების სურვილი არ გამოთქვა”, - ამბობს ტურისტი.
“ჯი-ეიჩ-ენი” ინფორმაციის გადასამოწმებლად და იმის გასარკვევად, მიმდინარეობს თუ არა გამოძიება, შინაგან საქმეთა სამინისტროს დაუკავშირდა.
უწყებაში გვითხრეს, რომ მომხდართან დაკავშირებით წინასაგამოძიებო მოქდემებები მიმდინარეობს. მათივე თქმით, ისინი ბარის მეპატრონეს [რომელიც ქალაქში არ იმყოფება] ელოდებიან, რათა კამერის ჩანაწერები ამოიღონ.