დღეს აჭარის მთავრობის აპარატთან გამართულ აქციასთან დაკავშირებით, აჭარის პრესსამსახურში განაცხადეს, რომ სოფელ წყავროკას ფერმერების მიერ წამოჭრილ პრობლემასთან დაკავშირებით აჭარის სოფლის მეურნეობის სამინისტროში განმარტებები არაერთხელ გაკეთდა. აჭარის ავტონომიური რესპუბლიკის სოფლის მეურნეობის მინისტრი ტიტე აროშიძე ერთი კვირის წინ იმყოფებოდა სოფელ წყავროკაში და დეტალურად გაეცნო მეთხილეობის სექტორში არსებულ სიტუაციას და ექსტენციის (აგროსწავლების), აგროდაზღვევის და სხვა ღონისძიებების მაქსიმალურად ჩართვასთან დაკავშირებით მიაწოდა ინფორმაცია მეთხილე ფერმერებს.
აჭარის სოფლის მეურნეობის მინისტრის ტიტე აროშიძის თქმით, თხილის მასიური გაფუჭება განპირობებულია ბაქტერიული და სოკოვანი დაავადებების მიერ, რომელსაც დროული წამლობა სჭირდება ადრე გაზაფხულიდან. თხილის გაფუჭება მთლიანად ფაროსანას ბრალი არ არის, ფაროსანას გამოწვეული ზიანი მხოლოდ 11-12 % ფარგლებში მერყეობს. „ სახელმწიფოს მხრიდან პრევენციის და მოსახლეობის მხარდაჭერის მიმართულებით არაერთი ღონისძიება იქნა განხორციელებული. ჩვენ ყველაფერს გავაკეთებთ იმისთვის, რომ მოსახლეობას შეუმსუბუქდეს ის პრობლემა, რომელიც ადგილზე არსებობს. ჩვენ უახლოეს მომავალში კიდევ ერთხელ შევხვდებით აგროდაზღვევის წარმომადგენლებს და გვექნება მათთან ინტენსიური, დეტალური საუბარი თუ რა შეიძლება გაკეთდეს სამომავლოდ. აღნიშნულ ადგილებში ჩვენ უკვე ჩავატარეთ დამატებითი იქსპედიციები. მთავარი მიზეზი არის ის, რომ შესაწამლი საშუალებები, რომელსაც ვთავაზობთ მოსახლეობას გამოსაყენებლად და რომელიც არ არის ძვირი, სამწუხაროდ, მათი გამოყენება ინსტრუქციის მიხედვით ვერ ხერხდება ან არ ხერხდება. დღესაც შეიძლება ითქვას, რომ მოსახლეობას სახლში აქვს ნაწილი შესაწამლი ნივთიერებებისა, ჩვენ დავარიგეთ შესაწამლი აპარატებიც, რომელიც შეუძლიათ გამოიყენონ, მაგრამ სამწუხაროდ, ეს კომპლექსური პრობლემები თავს იყრის და მივდივართ ძალიან ცუდ შედეგამდე. ამიტომ მნიშვნელოვანია, მოსახლეობა აქტიურად ჩაერთოს სწავლების პროცესში და აგვიბას მხარი, რათა მოახდინოს თავისი კულტურების დროული შეწამვლის განხორციელება. რისკი იმისა, რომ მოსავალი მავნებლების მიერ მთლიანად გაუნადგურდებათ, რა საკვირველია, შემცირდება და ჩვენს ხელთ არსებულ რესურსს ბოლომდე გამოვიყენებთ რათა მოვაგვაროთ აღნიშნული პრობლემა» - აღნიშნა ტიტე აროშიძემ და განმარტა, რომ ფერმერების მოთხოვნა კომპენსაციასთან დაკავშირებით ვერ იქნება განხილული, რადგან გაფუჭებული მოსავლის დათვლა მაშირ, როცა ხილი მოკრეფილია, შეუძლებელია. „თავიდანვე უნდა მოვახდინოთ პრევენცია იმისა, რაც ხდება. რომც მოინდომოს სახელმწიფომ, კომპენსირება არასამართლიანი იქნება. მთავარია პრევენცია და არა კომპენსაცია“ - აღნიშნა აჭარის სოფლის მეურნეობის მინისტრმა.
აჭარის სოფლის მეურნეობის სამინისტროს ინფორმაციით, სამინისტროს მიერ მიმდინარე წელს სოფელ წყავროკაში გადაცემულია 45 ერთეული მაღალი წარმადობის ბაღის მობილური შემასხურებელი აპარატი. საშუალოდ, ყოველ 11.5 ჰა თხილის პლანტაციაზე 1 ერთული შემასხურებელი აპარატი მოდის დასამუშავებლად.
