მიუხედავად პრემიერის მოწოდებისა, კომპანია „საქნახშირი ჯი აი ჯის“ ადმინისტრაცია ბოლო ორი დღის მანძილზე ყველა დასაქმებულს ურეკავს და სთხოვს, სამუშაო ადგილზე დაბრუნებას, - ამის შესახებ დღეს საქართველოს პროფკავშირების გაერთიანების ოფისში გამართულ პრესკონფერენციაზე თავმჯდომარის მოადგილე რაისა ლიპარტელიანმა განაცხადა.
მისი თქმით, ადმინისტრაციამ გუშინ აღნიშნულთან დაკავშირებით ბრძანება გამოსცა, სადაც მითითებულია, რომ ეს ეხება ყველა დასაქმებულს, წინააღმდეგ შემთხვევაში, მათ გაცდენილი დღეები არ აუნაზღაურდებათ.
„ჩვენი კანონმდებლობით, ნებისმიერს აქვს უფლება, არ იმუშაოს, როდესაც მის სიცოცხლეს საფრთხე ექმნება. მეორე მხრივ, ადმინისტრაციის ეს ბრძანება პრემიერის განცხადებას ეწინააღმდეგება, რომლითაც შახტებში სამუშაოები უნდა შეჩერდეს და ამასთან, უნდა მოხდეს ამ დღეების ანაზღაურება“, - განაცხადა ლიპარტელიანმა.
ის მოუწოდებს პრემიერს, დაუყოვნებლივ მოიწვიოს სამხრივი კომისიის სხდომა, სადაც მიმდინარე წლის აპრილში პროფკავშირის მიერ შახტებთან დაკავშირებით მოთხოვნებს განიხილავენ.