საქართველოს პრემიერ-მინისტრობის კანდიდატი მამუკა ბახტაძე ახალი ინიციატივით გამოდის და მორიგ ამნისტიას აანონსებს. როგორც საპარლამენტო მოსმენისას პრემიერ-მინისტრობის კანდიდატმა აღნიშნა, არსებობს ინიციატივა, რომლის მიხედვითაც ყველა გადამხდელს 2013 წლის 1-ელ იანვრამდე არსებული საგადასახადო დავალიანება ჩამოეწერება.
“როდესაც ვსაუბრობთ უსამართლო წესებზე ეკონომიკაში, ამის ყველაზე ნათელი მაგალითი იყო 2011-2012 წლები, როდესაც ჩვენს მეწარმეებსა და ქართული კომპანიების მნიშვნელოვან ნაწილს დაარიცხეს არასწორი საგადასახადო ვალდებულებები. აქედან გამომდინარე და იმ მნიშვნელოვანი იდეის გათვალისწინებით, რომ ჩვენ ეკონომიკაში გვსურს, თითოეული აქტივი მონაწილეობდეს სრულფასოვნად, ჩვენი პირველი ინიციატივა შეეხება იდეას, რომ სრულად ჩამოვაწეროთ ყველა გადამხდელს 2013 წლის პირველ იანვრამდე არსებული საგადასახადო დავალიანება. ეს შეეხება დაახლოებით 36 ათას გადამხდელს. მათ უკან დგას ქართული ოჯახები, ენერგია და საშუალება, რომ განაგრძონ ქვეყნის ეკონომიკურ ცხოვრებაში სრულფასოვანი მონაწილეობა“, – განაცხადა მამუკა ბახტაძემ პარლამენტის რამდენიმე გაერთიანებულ კომიტეტზე.
