საქართველო, აღმოსავლეთ ევროპის სხვა ქვეყნებთან - ბოსნია-ჰერცოგოვინასთან, მაკედონიასთან, მოლდოვასთან, მონტენეგროსთან და თურქეთთან ერთად, ბელგრადში მეთევზეობის სექტორის შესახებ სამდღიან სემინარში მონაწილეობს. მონაწილე ქვეყნები მეთევზეობის სექტორში არსებულ რეგულაციებს და განხორციელებულ პოლიტიკას, ბაზრებზე წვდომას და აღმოსავლთ ევროპაში თევზის პროდუქტებით ვაჭრობას მიმოიხილავენ.
თევზი საერთაშორისო სასურსათო ბაზარზე ერთ-ერთი უმნიშვნელოვანესი სავაჭრო პროდუქტია. შესაბამისი გლობალური ვაჭრობის მოცულობა ყოველწლიურად 145 მილიარდ აშშ დოლარს შეადგენს. მოთხოვნა განსაკუთრებით მაღალია ევროპის ქვეყნებში.
რეგიონული შესაძლებლობების განვითარების სემინარი - "WTO, ბაზრებზე წვდომა და თევზით ვაჭრობა", ორგანიზებულია, გაეროს სურსათისა და სოფლის მეურნეობის ორგანიზაციის (FAO), EUROFISH-ის, სერბეთის სოფლის მეურნეობის, მეტყევეობის და წყლის რესურსების მართვის სამინისტროს მიერ.
„მნიშვნელოვანია ევროპაში სავაჭრო ბარიერების საკითხის მოგვარება“ - განაცხადა ვიქტორია კომომ, FAO-ს უფროსმა ოფიცერმა, მეთევზეობისა და აკვაკულტურის მიმართულებით - „ვაჭრობასთან დაკავშირებული პრობლემები რეგიონში სასურსათო უსაფრთხოებაზე, მეთევზეების, თევზის გადამამუშავებლების და ექსპორტიორების კეთილდღეობაზე აისახება“.
კომოს განცხადებით, მეთევზეობის და აკვაკულტურის ზოგიერთი ძირითადი სავაჭრო საკითხი მსოფლიო სავაჭრო ორგანიზაციის კომპეტენციას სცილდება. მეცნიერულ დონეზე გამყარებული სურსათის უვნებლობის რეგულაციები, ნებაყოფლობითი ეკო-მარკირება, უკანონო, აღურიცხავ და არარეგულირებად თევზჭერასთან (IUU) ბრძოლის მექანიზმები, ეს ყოველივე საბაზრო ღონისძიებების მნიშვნელოვანი მაგალითებია, რომლებმაც შესაძლოა განვითარებად ქვეყნებში ვაჭრობის განვითარება შეაფერხონ.
ევროკავშირი ზღვის პროდუქტების პროდუქტების უმსხვილესი იმპორტიორია. თუ გავითვალისწინებთ აღმოსავლეთის მიმართულებით ევროკავშირის მოსალოდნელ გაფართოებას, დღის წესრიგში დადგება საერთო რეგულაციების და პოლიტიკის მორგება. შესაბამისი ღონისძიებები შესაძლოა მოიცავდეს სახელმწიფო სერვისების გაუმჯობესებას, როგორიცაა ხარისხის უზრუნველყოფის ლაბორატორიების ამოქმედება, საბაჟო სამსახურები და კომერციული პროცედურები. სწორედ ამ საკითხების განხილვა წარმოადგენს ბელგრადში მიმდინარე სემინარის მიზანს.
