გაეროს ადამიანის უფლებათა დაცვის უმაღლესმა კომისარმა ზეიდ რაად ალ ჰუსეინმა, მოუწოდა აშშ-ს შეწყვიტოს ქვეყნის სამხრეთ საზღვრებზე მიგრანტების ოჯახებიდან ბავშვების იძულებით გაყოფის პრაქტიკა. ამის შესახებ მან დღეს გაეროს საბჭოს 38-ე სესიის გახსნისას განაცხადა, რომელიც ადამიანის უფლებების დაცვას ეხებოდა.
„მე ძალზე შეშფოთებული ვარ აშშ-ში ეხლახანს მიღებული კანონით, რომელიც სჯის ბავშვებს მათი მშობლების მოქმედებების გამო. ბოლო 6 კვირის განმავლობაში დაახლოებით 2 ათასამდე მოზარდი ძალადობრივი გზით იქნა მოცილებული თავიანთ მშობლებს“ - განაცხადა მან.
გაეროს ადამიანის უფლებათა დაცვის უმაღლესი კომისარი აცხადებს, რომ ამერიკის ძალადობრივმა მოქმედებებმა ქვეყნის სამხრეთ საზღვარზე ბავშვების მიმართ, შესაძლოა გამოიწვიოს გამოუსწორებელი ზიანი მათ ჯანმრთელობაზე.
"მე მოვუწოდებ აშშ-ს, დაუყონებლივ შეწყვიტოს პრაქტიკა ოჯახებიდან ბავშვების ძალადობრივი გამოყოფისა და მინიმუმ მოახდინოს რატიფიცირება ბავშვთა უფლებების კონვენციისა, რათა ისე მოხდეს, რომ დაცული იყოს ბავშვთა ძირითადი უფლებები, როგორიც არ უნდა იყოს მათი ადმინისტრაციული სტატუსი“ - ხაზი გაუსვა მან.
გაერო-ს ადამიანის უფლებათა საბჭოს სხდომა ჟენევაში 18 ივნისიდან 6 ივლისამდე გაიმართება. ეს უკანასკნელი სხდომაა გაეროს ადამიანის უფლებათა უმაღლესი კომისარის ზეიდ რაად ალ ჰუსეინისთვის, რომელიც აგვისტოში თავის თანამდებობას დატოვებს.
