საქართველოს პრეზიდენტის გიორგი მარგველაშვილისა და რუმინეთის ვიცეპრემიერის ანა ბირჩალის შეხვედრაზე მხარეებმა ქვეყნებს შორის არსებული ურთიერთობების გააქტიურება და ორმხრივი ურთიერთობების დღის წესრიგში არსებული ტრადიციული თემატიკა განიხილეს.
რუმინეთის ვიცეპრემიერი საქართველოში პირველი რესპუბლიკის დაარსების 100 წლისთავის აღსანიშნავ საზეიმო ღონისძიებებში მონაწილეობის მისაღებად საქართველოში სამუშაო ვიზიტით იმყოფება.
როგორც პრეზიდენტის საერთაშორისო მდივანმა თენგიზ ფხალაძემ აღნიშნა, მხარეებმა ეკონომიკური და სავაჭრო ურთიერთობები შავ ზღვასთან დაკავშირებული სავაჭრო ურთიერთობების კონტექსტში განიხილეს.
"კიდევ ერთხელ აღინიშნა, რომ სწორედ ჩვენს თანამშრომლობაზეა დამოკიდებული ის, რომ ახალი იმპულსი მიეცეს სავაჭრო - ეკონომიკურ ურთიერთობებსა და თანამშრომლობას", - განაცხადა თენგიზ ფხალაძემ.
საქართველოს პრეზიდენტმა სტუმართან ნატო-ს მომავალი სამიტისათვის მზადების საკითხი განიხილა და აღნიშნა, რომ საქართველოსათვის უაღრესად მნიშვნელოვანია პარტნიორი ქვეყნების მხარდაჭერა და მათთან ერთად კოორდინირებული და შეთანხმებული ნაბიჯების გადადგმა აღნიშნულ კონტექსტში.
