ეკონომიკის სამინისტრო ფეხსაცმელების, ჩანთებისა და ტყავის სხვა ნაწარმის ბაზარზე საქართველოს დიდ პოტენციალს ხედავს.
ხედვა შიდა და საერთაშორისო კვლევებით არის გამყარებული, რომელიც ამ ბაზარზე უმსხვილესი წილის მქონე ჩინეთთან საქართველოს უპირატესობას ადასტურებს.
საუბარია ევროკავშირზე, რომლის იმპორტი, მხოლოდ ფეხსაცმელების ნაწილში, 60 მილიარდ ევროს აღემატება.
ეკონომიკის მინისტრის მოადგილე გიორგი ჩერქეზიშვილი განმარტავს, რომ ბოლო პერიოდში ამ ბაზარზე ჩინეთის წილი 63%-დან 50%-მდე შემცირდა, იმპორტის ნაწილი სხვა აზიურ ქვეყნებზე გადავიდა, მათ შორის ბანგლადეშზე.
„დღეს საქართველოში რომ მოხდეს ფეხსაცმლის წარმოება, სპორტულ ფეხსაცმელზეა მეტი აქცენტი, საგადასახადო და სხვა კუთხით, ჩვენ ჯამში, გვაქვს 18%-იანი უპირატესობა ჩინეთთან შედარებით, რომელიც ლიდერია და ევროკავშირში მისი წილი 50%-ია“, - განაცხადა ჩერქეზიშვილმა.
მისი თქმით, უკვე მონიშნულია ლოკაციებიც, სადაც საწარმოების გახსნა იქნება შესაძლებელი. 3 ლოკაცია დასავლეთ საქართველოშია, 1 რუსთავთან ახლოს, თუმცა ეს არ ნიშნავს, რომ აუცილებლად ამ ტერიტორიების ათვისება ევალება ინვესტორს.
გიორგი ჩერქეზიშვილის თქმით, ფეხსაცმელების წარმოების პოტენციალზე ჯერ მხოლოდ 1 როუდ შოუ გაიმართა, ჩინეთის ერთ-ერთ პროვინციაში, რომელსაც ამ დარგის 1 კომპანია ესწრებოდა, შედეგად, აგვისტოს თვეში დაინტერესებული 8 ჩინური კომპანია ჩამოდის საქართველოში.