უკვე მეხუთე სხდომაა თბილისის საქალაქო სასამართლოში ე.წ. პიჯაკების საქმეზე მთავარ აუდიტორს, ნოდარ ვეკუას უსმენენ. როგორც სახელმწიფო დაცვის სპეციალური სამსახურის ყოფილი უფროსი, ბრალდებული თეიმურაზ ჯანაშია აცხადებს, აუდიტორი მნიშვნელოვან კითხვებზე პასუხს ვერ სცემს.
"მოწმე აუდიტორი ძალიან ტენდენციურია, შეკითხვებზე პასუხს არ გვაძლევს. შესაბამისად, მისი დაკითხვა შემდეგ სხდომაზეც გაგრძელდება, რადგან სასამართლომ ჩათვალა, რომ კითხვებზე პასუხი უნდა მიიღოს. ნოდარ ვეკუას ჩვენებაზეა ფაქტობრივად ეს ბრალი აგებული და შეთითხნილი. ნაწილობრივ პრეზიდენტის განკარგულებაზეც მსჯელობს, ნაწილობრივ მსჯელობს განკარგულების აღსრულებაზეც. თუმცა,ფაქტობრივ ხარჯსა და განკარგულებაში არსებულ ჩამონათვალს შორის კავშირზე არ უნდა რომ რამე გვითხრას. უკვე მე-13 საათია ადამიანი არ გველაპარაკება, ათასნაირ სხვა გარემოებაზე გველაპარაკება, მაგრამ კონკრეტულად რომ ვეკითხებით, სააკაშვილმა რომ იმგზავრა, ამ განკარგულებაში რომ ეწერა ეს ხარჯი სდსს უნდა დაეფარა, ამ განკარგულების ტექსტი და გადასახადი ერთმანეთს შეესაბამება თუ არა, ამაზე პასუხს ვერ ვიღებთ და ვერც ვერასდროს მივიღებთ, რადგან ეს დასკვნა ფალსიფიცრებულად აქვს გაკეთებული. ის განკარგულებების და ხარჯების შესაბამისობაზე არ საუბრობს", - აცხადებს ჯანაშია.
თავის მხრივ, საქმის პროკურორი, გიორგი მუჯირი კი, განმარტავს, რომ დაცვის მხარე დროს ხელოვნურად აჭიანურებს და მოწმეს ერთი და იმავე შინაარსის კითხვებს უსვამენ.
"ბრალდების მხარეს რჩება შთაბეჭდილება რომ პროცესის ხელოვნურად გაჭიანურება ხდება, რადგან სამი სასამართლო სხდომაა რაც აუდიტორის დაკითხვა მიმდინარეობს. ხშირ შემთხვევაში ერთი და იმავე შინაარსის კითხვები ისმევა. ბრალდების მხარის მიერ კითხვები ხშირად პროტესტდებოდა.
რაც შეეხება თავად აუდიტორის ჩვენებას, კიდევ ერთხელ დაადასტურა ანგარიშის სისწორე და დადასტურდა, რომ პრეზიდენტის განკარგულება, რომელიც გამოცემული იყო სახელმწიფო დაცვის სპეციალური სამსახურისთვის თანხების გამოყოფაზე, არ შეესაბამებოდა საბიუჯეტო კანონმდებლობას. ხოლო მეორე მიმართულება, რომელიც ასევე დადასტურებული იქნა აუდიტორის მიერ, არის ის, რომ გაწეული ხარჯი მიზნობრივი არ იყო, შესაბამისად არ შეესაბამებოდა სახელმწიფო დაცვის სპეციალური სამსახურის მიზნებს", - განმარტავს მუჯირი.
ცნობისთვის, მიხეილ სააკაშვილსა და თეიმურაზ ჯანაშიას, სახელმწიფო ბრალდება საბიუჯეტო თანხების დიდი ოდენობით ჯგუფურად გაფლანგვას ედავება.
